રાજતરઙ્ગિની · શ્લોક 644-663

મન્ત્રિણા સૂહભટ્ટેન પાલિતૈર્ લાલિતૈર્ જનૈઃ ।
જ્ઞાતો ઽદર્શનમાત્રેણ સ્વર્યાતશ્ શ્રીસેકન્દરઃ

શ્રીસેકન્દરશાહિર્ યં શોભાદેવ્યાસ્ સ્વમ્ આત્મજમ્ ।
ઉત્પિઞ્જાનામ્ અભાવાર્થં સ્વદેશાન્ નિરવાસયત્

ઉદીચીપતિના રાજપુત્રત્વાદ્ અભિનન્દિતમ્ ।
કશ્મીરાન્ આયયૌ જેતું તમ્ આદાયાથ મહ્મદઃ

તુરુષ્કકટકૈસ્ સાર્ધં શ્રુત્વા પિરુજમ્ આગતમ્ ।
વ્યસૃજત્ તન્નિરોધાય સૂહશ્ શ્રીલદ્દગૌરકૌ

મન્ત્રૈશ્ શ્રીલદ્દરાજસ્ય વિક્રમૈર્ ગૌરકસ્ય ચ ।
સા તુરુષ્કચમૂશ્ શાન્તા વ્યાધિર્ દાનજપૈર્ ઇવ

વીતભીતિસ્ તતો મન્ત્રી કમ્પનાધિપતિં વ્યધાત્ ।
લદ્દરાજં ગૌરભટ્ટં ક્રમરાજ્યેશ્વરં ચ સઃ

સન્ધ્યાક્ષણ ઇવોદગ્રે સૂહે રઞ્જિતભૂભૃતિ ।
નાભૂતામ્ ઉદિતૌ રાજયુવરાજૌ રવીન્દુવત્

શ્યેનો હન્તિ પતત્રિણો મૃગપતિર્ નિષ્પાતયિષ્ણુર્ મૃગાન્ ભિદ્યન્તે મણયો ઽપિ વજ્રમણિના ખાતા ખનિત્રૈર્ મહી ।
પુષ્પાણીવ ચ ભાસ્વતા ગ્રહગણાસ્ સૂર્યેણ નિર્ધૂનિતાઃ પ્રાયેણાત્ર વિલોક્યતે પરિભવત્રાસસ્ સજાતીયતઃ

દ્વિજાતિપીડને ઽનેન પ્રેરિતો ઽપિ મુહુર્ મુહુઃ ।
શ્રીસેકન્દરભૂપાલẖ કરુણાકોમલાશયઃ

યવનાબ્ધિમહાવેલાં યામ્ અકાર્ષીત્ કથઞ્ચન ।
ઉલ્લઙ્ઘિતા દ્વિજાતીનાં તેન દણ્ડસ્થિતિસ્ તતઃ

દર્શનાન્તરવિદ્વેષી પ્રદોષસ્ તમસાં નિધિઃ ।
યાગયાત્રાદિ નાગાનાં દુર્વૃત્તસ્ સ ન્યવારયત્

શઙ્કમાનẖ કૃતાતઙ્કસઙ્કોચાનાં દ્વિજન્મનામ્ ।
વિદેશગમનાજ્ જાતિરક્ષામ્ અક્ષામમત્સરઃ

"મોક્ષાક્ષરં વિના માર્ગો દાતવ્યો નૈવ કસ્યચિત્" ।
ઇત્ય્ આદિશદ્ અશેષાન્ સ માર્ગરક્ષાધિકારિણઃ

તતો મીનાન્ ઇવ વ્યાધો દત્તબન્ધે સરિજ્જલે ।
દ્વિજાતીન્ અતિદુર્જાતો દેશે ઽસ્મિન્ ન્યગ્રહીત્તરામ્

તદ્ભયાનલસન્તાપં પાપં ચ બહવો દ્વિજાઃ ।
અગ્નિજ્વાલાપ્રવેશેન સહસૈવ ન્યવારયન્

કેચિદ્ વિષેણ પાશેન પરે તોયેન ચાપરે ।
ભૃગુણા વહ્નિના ચાન્યે વિપ્રા ભીત્યા વિપેદિરે

રાજદ્રોહસહસ્રેણ રક્ષિતું રાજવલ્લભાઃ ।
ન ત્વ્ એકમ્ અશકન્ વિપ્રમ્ એતસ્મિન્ દ્વેષદૂષિતે

દુર્વહત્વેન નિન્દન્ સ રાજ્યભારમ્ અલં ખલઃ ।
અશ્લાઘત દ્વિજાક્રન્દશ્રવણાનન્દલાભતઃ

ગૃહાદ્ ધૂમ્યેવ વિપ્રાણાં પઙ્ક્તિર્ જાત્યભિમાનિની ।
રુદ્ધદ્વારાત્ તતો દેશાદ્ અપમાર્ગૈર્ અપાસરત્

ત્યક્ત્વાપિ પિતરં પુત્રસ્ તં પિતા ચાગમદ્ દ્વિજઃ ।
સૂહાન્તકે કૃતાક્ષેપે વિદેશં પરલોકવત્