Rājataraṅginī · Verses 604-623

[Ps-JRT 92]
taddarśanabhayeneva tirobhūtas svayambhuvaḥ /
tadā Hutāśo nāśoci nikaṭasthair drumaiḫ param // JRt_B.770 //
bhītyevāpaḫ prakāśya svās trisandhyaṃ tatra majjataḥ /
Sandhyādevī paraṃ vandhyā tasyāgād anukampyatām // JRt_B.771 //
kathāśeṣīkṛte sarvagīrvāṇapratimāgaṇe /
vyādhimukta ivānandaṃ Sūhabhaṭṭo 'bhajat tataḥ

[Ps-JRT 93]
SindhŪdabhāṇḍapurayos svāminau śrīSekandaraḥ /
śrīŚobhākanyayoḫ pāṇigraheṇānvagrahīd atha // JRt_B.773 //
pratyamuñcat svadeśotkaṃ Merasaidamahammadam /
rājā sahacarīkṛtya Śobhāputraṃ sa Pirvajam // JRt_B.774 //
darśitair Mausulaiś śāstrair jātidveṣamayair iva /
aśrāvi tena tad rājā kim asādhyaṃ durātmanā // JRt_B.775 //
apathyāśīva bālas sa sāmantasahitas tataḥ /
janānāṃ jātividhvaṃse Sūhabhaṭṭaẖ kṛtodyamaḥ

"jātidhvaṃse mariṣyāmo" dvijeṣv iti vadatsv atha /
jātirakṣānimittaṃ sa tān durdaṇḍam ajigrahat

prasādaprāptilobhena bhūpater upajīviṣu /
brāhmaṇatvādhikāṃ jātiṃ tyajatsv apy avilambitam

śrīSiṃhabhaṭṭaKastūṭau vaṇijau ślāghyatāṃ gatau /
śrīNirmalācāryavaryas trijagacchlāghyatāṃ gataḥ

tyaktvā jātigrahaṃ yat tāv anyadarśanasevinau /
śuṣkaṃ Turuṣkadaṇḍaṃ ca vinyavārayatāṃ tataḥ

Nirmalācāryavaryas sa sarvasvaṃ tṛṇavat kṣaṇāt /
tyajan rājaprasādena na jātiṃ svām adūṣayat

[Ps-JRT 94]
paśyatāṃ sarvalokānāṃ Brahmadaṇḍo 'patad divaḥ // JRt_B.778 //
kṛtavraṇas sa tenāṅge visarpiklinnavigrahaḥ /
kīryamāṇakrimikulaẖ krakacaiś cāritair abhūt // JRt_B.779 //
anubhāvya vyathāṃ bhāvinirayakleśavarṇikām /
gaṇarātreṇa taṃ prāṇāẖ kāṅkṣitāpagamā jahuḥ /
Brahmadaṇḍakṛtaṃ daṇḍaṃ bhuktvā daṇḍadharādhipaḥ // JRt_B.780 //
daṇḍākrāntas sa rājātha Merakhānaṃ nije pade /
abhiṣicyĀliśāhākhyāṃ kṛtvāsyāgād Yamālayam // JRt_B.781 //
svāmī bhṛtyāparādhena daṇḍanīya iti sthiteḥ /
Sūhabhaṭṭāparādhena kālo bhūpe 'karot krudham

jyāyāṃsam abhiṣicyātha putraṃ Sikandaro nṛpaḥ /
nandāṣṭābde tato jyaiṣṭhakṛṣṇāṣṭamyāṃ vyapadyata

22a) ‛Alī Šāh (LS 4489-4494)
[Ps-JRT 95]
rūpaṃ niṣphalam arcitaṃ kim api tan mandān amandāgrahān bhaktān yas samanugrahītum atulasvācchandyavandyakriyaḥ /
Gaurīrūpakarīṃ vapussahacarīṃ svāṃ śaktim avyaktayad bhuktiṃ muktipurassarīṃ diśatu vo devas svayambhūr ayam // JRt_B.784 //
viśrāmyatutarāṃ Śāhikhānavṛttāntasānuni /
madvāk śrāntānyarājākhyāśailakoṭiśikhāṭanaiḥ // JRt_B.785 //
tadguṇaugharasaślāghyāṃ pibantv api giraṃ mama /
sugandhighanasāreṇa kūpāmbho 'pi manoramam // JRt_B.786 //
Āliśāhas sa vasudhāsudhāṃśur jagatas tamaḥ /
pradoṣārabdham acchaitsīd bhāsvato 'ste pitus tataḥ

adarpakacitaṃ bālaṃ prauḍhā Lakṣmīr muhur muhuḥ /
kulajāliṅgad aṅgais taṃ rājānaṃ natiśālibhiḥ

[Ps-JRT 96]
tasya bālyaṃ manohāri viśeṣād rājyarājitam /
kāntiṃ kalayate kāntaḫ pūrṇenduś śaradi sphuran // JRt_B.789 //
pūrvorvareśavad bālam api taṃ bhūbhujo 'naman /
ahidaṣṭo hi dāmāpi kramituṃ na pragalbhate

nijabuddhibalād daivahitatvenopasaṃhitāt /
Sūhabhaṭṭena mukhyatvaṃ sacivānām avāpyata

viśvāsanyastaśastraṃ sa Laddamārgapatiṃ balāt /
baddhavān saha tatputrair varjayitvā Muhammadam

Muhammado mārgapater bandhaṃ śrutvaiva śauryavān /
Bhāṅgilācalamārgeṇa mārgābhijñaḫ palāyitaḥ

[Ps-JRT 99]
mārutasyeva vīrasyeva gatiẖ kvāpi na hanyate /
śrutvā tadgamanaṃ dūtān mantranirbhedaśaṅkitaḥ /
Laddamārgapatiṃ roddhuṃ sahasā samacintayat // JRt_B.816 //
rujas saṃvīkṣaṇavyājān mārgeśasya śayāptaye /
viśvāsanāya ca prāsyad bhaṭṭOtsaṃ tasya sadmani // JRt_B.817 //
cikitsakauṣadhāhārī mārgeśatiminādṛtaḥ /
nābodhi piṇḍīnirgūḍhabaḍiśaṃ punar Utsavaḥ // JRt_B.818 //
tāvan mārgapates saudhaṃ siṃhanādodbhaṭair bhaṭaiḥ /
javād rodhitavān mantrī dāśo nīḍaṃ tṛṇair iva // JRt_B.819 //
tīkṣṇair api dayāviṣṭair iṣṭair iva sa vihvalaiḥ /
kathañcid doṣarahito mārgeśas samarudhyata // JRt_B.820 //
nirudhyamānaṃ niśśaṅkam agadaṅkāraŚaṅkaram /
aprayuktātitīkṣṇāpi śastrī dhīś ca vyaḍambayat

apaśyan darpataẖ kiñcit siṃho viśatu vāgurām /
citraṃ tu tad viśet pāśaṃ dūradṛśvāpi yat khagaḥ

[Ps-JRT 100]
tato mārgapateḫ putrān meṣān iva sa saunikaḥ /
ruddhavān uddhatakrodhaḫ pāpmā mūrta ivāparaḥ // JRt_B.823 //
tābhyāṃ saparivārābhyāṃ kārāgāram apūpurat /
na paraṃ bhuvanaṃ sarvaṃ duryaśobhiś ca niścalaiḥ // JRt_B.824 //
ekāhenaiva tac chrutvā Mahmadaḫ prāpticintayā /
kanyayeva daridras sa naktandivam adūyata

Durdaṇḍadeśe Govindanāmno mitrasya veśmani /
viśvastaḫ prāviśat tāvad viśramārthaṃ Muhammadaḥ

[Ps-JRT 101]
śrīSekandaradattaitaddeśādhīkāraśālinā /
Mahmadasya purā śākhī tenānāṭi hi durdhiyā // JRt_B.827 //
vahner dhūmavivardhitaś śamayati jvālābharaṃ vārido vṛkṣakṣodabhavo vanāni nayati kṣipraṃ kṛśānuẖ kṣayam /
dāhaṃ janmabhuvo diśed viṣatarur vairasyadoṣāvahaṃ druhyaty atyupakāriṇe 'pi nitarāṃ lobhābhibhūto janaḥ