Rājataraṅginī · Verses 564-583

hastidvaye samārūḍhe himādriśikharaśriyi /
Vindhyavṛddhibhramād Vindhyaniyantā kopam āgamat

mārge kopam agātāṃ tau Vitastātaraṇakṣaṇe /
pratibimbaṃ nijaṃ dṛṣṭvā pratihastibhramaṃ gatau

[Ps-JRT 77]
didṛkṣayaiva kariṇo rājadhānyāṃ mahīpateḥ /
noccaṃ śiro 'bhavat tasya tattṛptyā Timirād api // JRt_B.699 //
rājastrīstanasaundaryacauryakārikaṭotkaṭau /
tau gajau bhūmipālena vārīkārāṃ praveśitau

vadanyena narendreṇa suvarṇaparipūritāḥ /
naivārthinaḫ paraṃ deśo nijo 'pi pravyadhīyata

yathākāmārpaṇaprītayācakastutilajjayā /
vinaman saṅkucan hastas tasya dānakṣaṇe 'bhavat

dānaṃ varṇayituṃ tasya śakyate naiva kenacit /
pāṇirūpam adhaḫ padmaṃ yatropari jalaṃ sadā

sadā dānāmbusekād yan na prārohad yavaẖ kare /
khaḍgatsaruvimardānāṃ manye tatra nimittatām

[Ps-JRT 78]
avācyā saubhagaślāghā śrīSekandarabhūpateḥ /
tyaktāpi yaṃ svayaṃ Lakṣmīr bhūyo bhūyas samāśritā // JRt_B.705 //
dānodyamaparād rājñas sphuranmukharucaḫ puraḥ /
Kamalā dānabhītyeva padmād api palāyata // JRt_B.706 //
ājīvam eva tiṣṭhantī nindyā Śrīs tasya tūttamā /
sānyajanmasv api prattā yad Vāgdevīva bhāvinī // JRt_B.707 //
prajāpāpavipākena tato Yavanadarśane /
bālasyeva mṛdi kṣoṇipate rucir avardhata

aneke Yavanā dānaprasiddhaṃ tam athāśrayan /
vihāyāparabhūpālān puṣpāṇīvālayo dvipam

dīptendur iva ṛkṣāṇāṃ teṣāṃ bālo 'pi vidyayā /
Yavanānām abhūj jyeṣṭho Merasaidamuhammadaḥ

anamad bhṛtyavac chikṣāṃ śiṣyavan nityam agrahīt /
dāsavac ca puro nītyā rājā tatra nyavikṣata

marudbhir iva vṛkṣāṇāṃ śālīnāṃ śalabhair iva /
Kaśmīradeśācārāṇāṃ dhvaṃso 'tha Yavanaiẖ kṛtaḥ

svāmino dānamānābhyāṃ vaiśadyaguṇavattayā /
Kaśmīrān aviśan Mlecchās sukṣetraṃ śalabhā iva

[Ps-JRT 80]
vidvān abhyāsabodhābhyāṃ vidyām iva viśāmpatiḥ /
sa lakṣmīṃ tyāgabhogābhyām aśobhayad avīvṛdhat // JRt_B.714 //
Udabhāṇḍapurādhīśaṃ dṛpto jātu jayan nṛpaḥ /
śrīMerāṃ tatsutāṃ prāpa mūrtām iva jayaśriyam

avātarac Chāhikule nūnaṃ sā kāpi devatā /
yojayiṣyati tatputraẖ Kaśmīrān Mlecchanāśitān

śrīJainollābhadīnākhyo mūrto dharmaẖ kalāv api /
rājāpi yogirājo 'yaṃ rājacūḍāmaṇeḫ priyaḥ

[Ps-JRT 82]
Yavanā guravo bhṛtyās sevakā vallabhās tataḥ /
bāndhavāś cābhavaṃs tasya kākāḫ pikaśiśor iva // JRt_B.718 //
kenāpi rasasiddhena dattastokaraso nṛpam /
rasasiddhiṃ vadan dhūrto Mahādevābhidho 'bhyadhāt

[Ps-JRT 83]
sahasravedhitā tena rasenaiva na sādhitā /
vismayena rasenāpi kāñcanaśriyam ṛcchatā // JRt_B.720 //
sadā rājñi mahībhārodvahanād anurodhavān /
adān Merur Mahādevarūpeṇa draviṇaṃ bahu

rasasiddhaprasādo 'tha Mahādevasya hīnatām /
agaman na tu Kaśmīranivāsaviṣaye manāk

rasasiddhibhramārthaṃ sa kṛtvā dṛgbandham auṣadhaiḥ /
hemeva mūṣikāmadhye ciram āsīt kiran kila