Rājataraṅginī · Verses 544-563

[Ps-JRT 71]
Śobhānāmamahādevyās so 'dhivinnāṃ mahīṃ vyadhāt /
pratāpahema rājā tu nādhivedanikāṃ dadau // JRt_B.670 //
śrīŚobhāyā mahādevyāś ślāghyā lakṣmīr abhūttarām /
kṣmāṃ hemaliṅgair dyāṃ puṇyaliṅgair yā svair amaṇḍayat

"etadbandhughnam eṣo 'pi māṃ haniṣyati niścitam" /
ity Uddako rājaputraṃ viṣeṇātha vyapādayat

"nijayaiva kṛpāṇyāhaṃ svaṃ chindyāṃ kaṇṭham etayā /
yady ahaṃ tvāṃ nirundhyāṃ vā hanyāṃ ve"ty atha saṃvidā

viśvāsya Sāhakaṃ vīram Uddako 'tha vyapādayat /
āsannavinipātānāṃ drohā dūtā hi durdhiyām

yathā bhrātus tathā svasya vadhaṃ sambhāvayan nṛpaḥ /
prauḍhībhūtas tato vṛddhiṃ svaṃ pakṣaṃ kiñcid ānayat

Bhauṭṭāñ jitvāgato dṛpto 'sahamāno 'nyavaibhavam /
śrīŚobhābhrātaraṃ Khuñjyārājam Uddo 'vadhīt tataḥ

ādiśan sevakaṃ svaṃ sa dvārotpiñjāya Nimmakam /
rājño 'pi praṇayaṃ tyaktvā Holaḍām agaman madāt

tac chrutvā Laddarājādyā bhūpater anuyāyinaḥ /
yoddhuṃ baddhodyamāḫ Padmapuradhanvani dhanvinaḥ

pratyāsannavināśānāṃ prāyo matimatām api /
piśācādibhramo nūnaṃ svacchāyāsv api jāyate

Uddasainyair yato yoddhuṃ Vallāmaṭham upāgataiḥ /
pāreVitastaṃ mahiṣīṣv aśvabhrāntyā palāyyata

āVitastāpuraṃ rātrau tam anudrutya bhūpatiḥ /
vyāvartatātha taṃ baddhvā nagarotpiñjaśaṅkayā

[Ps-JRT 73]
manoviśālaṃ gaganaṃ paṭahais tarjayann iva /
sa prāviśat puraṃ rājā harṣaś ca hṛdayaṃ viśām // JRt_B.682 //
taṃ vadhyam api kārāyāṃ kāruṇyāt tu nṛpo 'kṣipat /
Uddakas tu sa viśvastadrohapāpamalīmasaḥ

śaṅkamāno vadhaṃ bhūpāt karuṇākomalād api /
nijayaiva kṛpāṇyātha svagalacchedam ācarat

[Ps-JRT 74]
madajvaro 'dbhutaḫ Pālapaśūnām evam apy abhūt /
āśrayan stabdhatāṃ yena tacchirāṃsi tadā ciram // JRt_B.683 //
kadācit saha taiḫ Pālakuñjair madaghūrṇitaiḥ /
palaṅgam āviśad rājasiṃhas sannakharadyutiḥ // JRt_B.684 //
tatra Pālottamāṅgāni vapuścakrān mahīpatiḥ /
śarāvān iva sūtreṇa kumbhakāro 'sinācchinat // JRt_B.685 //
pattrirāja iva vyālān sṛgālān iva kesarī /
Pālān dharaṇipālas sa kālāntikam athānayat

rājyaṃ śauryaṃ vayas tejo nirniyantraṇatā tathā /
tadā tathābhavad rājñaḫ pañcāgnitapasaḫ phalam

hanta rājñāṃ tataṃ darpatimiraṃ khaṇḍayan nṛpaḥ /
yātrām asūtrayac citraṃ Gotrabhidbhayadāṃ tataḥ

[Ps-JRT 75]
rūḍhaṃ tatsevakakṣatracchattraśeṣaphaṇāśataiḥ /
sa vyadhād ambarārohi rajo bhūmaṇḍalāntaram // JRt_B.691 //
viśvaṃ rañjayatā tasya pratāpena prathīyasā /
rājastrīnakhalakṣmaśrīḫ pāṇḍimānam avāpitā

tadaiva dīnābharaṇām apālakatayā yutām /
Mleccharājo vyadhāḍ Ḍhillīṃ vidhavām iva luṇṭhayan

tataḫ pratyāvrajan Mleccharājaẖ Kaśmīrabhūpateḥ /
śaṅkamāno gajendrau dvāv upāyanam acīkarat

hastidvayagaladdānarājivyājāt svayaṃ vyadhāt /
deśasīmāvibhāgaṃ sa Kaśmīrādhipateẖ kila