Rājataraṅginī · Verses 484-503

pravāsāgamanābhyāṃ tvaṃ svapituḫ pālitājñayā /
śrīRāma iva bhūlokaṃ yaśobhis svam apūpuraḥ

bhūto bhāvī ca sammāno yady api svaguṇais tava /
yauvarājyagrahād bhāraṃ laghūkuryās tathāpi me

svadhairyaṃ sabhyasaṃyogo nānābandhusamāgamaḥ /
tava rakṣādhikāraś ca daurmanasyaṃ vilumpate

yaśaseva pramītānāṃ paradeśanivāsinām /
mahatāṃ na hi jātu syād vibhavena sukhodgamaḥ

svarūpapratibimbena bhavatā svargavāsinaḥ /
tadutkaṇṭhābharo 'smākaṃ darśanena nivāryatām

"putraś Śāhābadenasya so 'yam" ity anyamaṇḍale /
aṅgulīmukhanirdeśaḫ prākṛtasyeva māstu te

rājñāṃ madanukampyānāṃ mukhaprekṣī bhavan bhavān /
Kaśmīraiśvaryam atulaṃ mā naiṣīr alpakaṃ svayam

vibhajya bhavati kṣoṇībhāraṃ Merugirāv iva /
sukhaṃ sampattim atulām Anantadyutir āpnuyām

[Ps-JRT 52]
kīrtiṃ suravadhūgītāṃ pātre śrīpratipādanāt /
sa karṇapūrayan rājā mādṛta svargamālatīḥ // JRt_B.572 //
priyayor āvayos snehaśrutisaukhyena śītalaiḥ /
niśśvāsair bhūpates svīyais syād aspṛhyaṃ ca cāmaram // JRt_B.573 //
yena mānena mām anvagrahīt sa vasudhādhipaḥ /
tvaṃ sañcarasva tenaiva mayi pālayati prajāḥ

[Ps-JRT 53]
trātā dyauś Śakrarājabhyām āvābhyāṃ ca samaṃ mahī /
Śeṣaikanāthāṃ pātālaLakṣmīṃ hasatu nissukhām // JRt_B.575 //
Udayaśrīmukhāmātyamatānuṣṭhānaśālinīm /
mamārthanāniṣedhena lakṣmīṃ maiva vṛthā kṛthāḥ"

ajānaṃl lolakarṇatvaṃ rājendrakariṇām atha /
panthānaṃ lekhavācī sa Kāśmīrāṇām agāhata

pavanais sammukhāyātair jhāṅkāraravadhāribhiḥ /
nyavāryateva Kaśmīrapraveśād rājanandanaḥ

sa viśann atha Kāśmīrasaraṇīm udajijvalat /
amalīmasayad rājñaś śrutiṃ tu khalacodanā

nakrās samudram iva kecid udetukāmā vātā latāntam iva kecana darpavṛttyā /
durmatriṇo bhuvanakānanacakravālahavyāśanā narapatiṃ pravilolayanti

atha praviṣṭe Kaśmīrān Hassane rājanandane /
Kudbhadenamahīpālaḫ piśunair ity akathyata

"sarvāsām eva buddhīnām uparīśvarabuddhayaḥ /
tathāpi sacivair vācyo hitāhitavinirṇayaḥ

Purandarādilokeśatejo'ṃśāśrayaśālinām /
svavaṃśyebhyo mahīndrāṇāṃ antarāyo vilokyate

sparśanāśitayā khyātād bhrātṛrūpād vijihmagāt /
kṛṣṇasarpād ivāśliṣṭāt kaṣṭaṃ dūre na kasyacit

vibhavais tarpyamāṇo 'yaṃ na ca svībhavitā tava /
snehena sicyamāno 'gniś śītalatvaṃ kim ṛcchati

[Ps-JRT 55]
varaṃ hālāhalo ghoro na durātmā ca durjanaḥ /
tasya pānād galaty ekaḫ parasya tv akhilaṃ kulam // JRt_B.586 //
daivād dūrataraṃ sarpaṃ prasarpadviṣadhāriṇam /
vinā daivakṛtaṃ ko nu nidhau sthāpayati svayam // JRt_B.587 //
na cintyaṃ "svayam ekākī rājño me kiṃ kariṣyati" /
hareḫ puras sayūtho 'pi katamo vāraṇeśvaraḥ