Rājataraṅginī · Verses 464-483

20) Quṭb-ad-Dīn (LS 4449-4465)
[Ps-JRT 44]
matveva bhūjayād bhūyaḫ punaruktāpavādatām /
Śāhābhadīne nirjetuṃ dyām iva prasthite sati // JRt_B.538 //
Kudbhadenanarendro 'tha maulāv ājñāṃ mahībhujām /
citte sukhaṃ mukhe harṣaṃ stutiṃ vāci nyadhāt tataḥ

[Ps-JRT 46]
tasya pratāpakamalā sagarvapadavīm agāt /
jayavyasanipūrveśavirahārteva bhūpateḥ // JRt_B.540 //
tadviyogāsahā deśadevī jayam adhāt svayam / JRt_B.541ab /
nātitīvro na vā mandas sarvasyaiva mahīpatiḥ /
cittam ādita lokasya vaiṣuvo bhānumān iva

[Ps-JRT 47]
ahnāyāpahnutaṃ yuddhe taddhanuḫpratikūjitam /
śocadvairivadhūvargakranditair matsarād iva // JRt_B.542 //
diṅmukhe candanālepaẖ kīrtir ambaracandrikā /
dharaṇīramaṇasyāsya dviṣām āmlāpayan mukham // JRt_B.543 //
kṣema lakṣmīṃ prajāẖ kṣoṇīpāle tanvati tanvati /
bhūmāv eva sthitā nākabhogasaukhyam abhuñjata // JRt_B.544 //
Loharapratyavekṣārthaṃ yān nyadhāt pūrvabhūpatiḥ /
Loharādhipater bhītyā te palāyya gatās tataḥ

śāmyanty oṣadhayas sarvāś śaśiny astaṃ gate sati /
dṛṣṭo hi sūryakāntānāṃ ravau yāti dyutikṣayaḥ

Loharaṃ pratisandhātuṃ Kudbhadenamahīpatiḥ /
śauryaśālinam ādikṣat puro ḍāmaraLolakam

aveṣṭayat tato gatvā Loharādriṃ sa sarvataḥ /
prāṇā hi svāmibhaktānāṃ tṛṇāyante mahātmanām

asāmarthyān nijaṃ durgaṃ durgendro 'rpayituṃ tataḥ /
brāhmaṇān vyasṛjad dūtāṇ ḍāmarādhipatiṃ prati

dvijaliṅgān sa tān matvā sāraṃ draṣṭum upāgatān /
nyagrahīd vigrahād ugrād dvijān avyagramānasaḥ

dvijadaivatam apy etaṃ śrutvā tadapakāriṇam /
Loharendreṇa koṭṭāśāṃ jīvāśāṃ ca visṛṣṭavān

paśyanto maraṇaṃ svasya yuddhe vātha palāyane /
kṣatriyāṇāṃ nijaṃ dharmam agrahīṣus tato raṇam

śilāsāraśilāvarṣair durdarśā durghanā iva /
Loharādrer avārohann ārohaṃs tu yaśāṃsi te

[Ps-JRT 49]
svaṃ khaṇḍīkṛtya śailena vibhaktaṃ svāmibhaktitaḥ /
pratyekaṃ śatravas teṣu śilāvarṣiṣv amaṃsata // JRt_B.554 //
viprakīrṇais sa pāṣāṇair Lolo ḍāmaranāyakaḥ /
antarhitas samaṃ kīrtyā bhāvi ko nāma laṅghati

śatrukīrṇaśilārāśicchanno ḌāmaraLolakaḥ /
Yavanapretasaṃskārān na vipady apy ahīyata

Śāhābadenabhūpālo nirvāsyāpi sutān nijān /
ākārayat svayaṃ lekhair nijavarṇapariṣkṛtaiḥ

guṇaiś ca vayasā teṣāṃ jyeṣṭho Māhendramaṇḍalam /
Hassano rājaputras sa prāpa tāvad anaṅkuśam

sa netraśuktimuktābhir muktābhir vāṣpavīcibhiḥ /
śrutvā tatra pitur mṛtyuṃ nivāpāñjalim ārpayat

vyāvṛtya gamanecchāyās svacchāśayam amuṃ tataḥ /
nyavārayat pitṛvyasya lekhaẖ Kaśmīrabhūpateḥ

"Śakrādisaukhyalobhena bhṛtyān asmān upekṣya saḥ /
samaskuruta Śāhābādīnabhūmipatir divam

svasstrībhogaraseneva gamanāya tvarāvataḥ /
tasyāsmābhir bhavatkāryam aśeṣaṃ nirapadyata

kṣmārakṣālakṣaṇām ājñāṃ vicakṣaṇaśiromaṇeḥ /
tanmantramālitāṃ maulimūle mālāṃ vidadhmahe