Rājataraṅginī · Verses 444-463

[Ps-JRT 39]
"audāryaśālinā rājñā svasamaṃ vardhitas svayam /
rājādhikaṃ vyavāhārṣīt tadā Madanalāvikaḥ // JRt_B.511 //
tulyārthas samasāmarthyaś śaṅkyo 'yam" iti bhūpatiḥ /
īrṣyālubhiẖ kusacivais tasmai param akopyata // JRt_B.512 //
śucim apy aśuciṃ matvā taṃ vītiṃ bhūmipāladhīḥ /
khalanāśāvṛtatvena na cittaviratābhavat // JRt_B.513 //
upaplāvayituṃ vāñchaṃs taṃ muhuẖ krodhavegataḥ /
rājaratnākaro 'rodhi tadīyaguṇavelayā // JRt_B.514 //
rājā jātatvarāṃ yātrāṃ vyasanenābhiṣeṇayan /
nausetukautukaṃ Sindhoḫ parikhāyā ivāharat

śūraẖ Khaḍganagaryāṃ sa paryaṭan mṛgayārasāt /
siṃham abhyadravad rājā siṃhasaṃhatasāhasaḥ

gacchaṃś cittādhikaṃ rājā vājinā vegarājinā /
anvagāmy atibhaktena Madanenaiva kevalam

[Ps-JRT 40]
ārūḍhaḫ pauruṣaṃ rājā so 'varūḍhas turaṅgamāt /
Yameneva vyadhād yuddhaṃ hariṇā krauryadhāriṇā // JRt_B.518 //
ekākinaṃ ciraṃ baddhayuddham uddhatakesaraḥ /
tam adhaẖ kṛtavān rājasiṃhaṃ siṃho 'tisāhasam

utplutya vājinas tūrṇaṃ śūro Madanalāvikaḥ /
nipātitanṛpaṃ siṃhaṃ kṛpāṇyā sahasāvadhīt

prāṇarakṣopakāreṇa prasannaḫ piśunāj janāt /
yuktyā māraṇam etasya śaṅkamāno nareśvaraḥ

sa vivāhacchalād dattvā draviṇaṃ karuṇāmayaḥ /
Madanaṃ vyasṛjaḍ Ḍhillīpater nikaṭam añjasā

utpannacaṇpakaṃ dīptyā kurvatīṃ vyoma jātucit /
svapne Śarkarasūhākhyo dṛṣṭavān kāñcanīṃ purīm

veśma veśma viśaṃs tatra śūnyaṃ paśyann ayaṃ tataḥ /
rājadhānyāṃ striyaṃ kāñcid apaśyat kāntidanturām

apṛcchac ca "tvam ekaiva hanteyati mahāpure /
vyomnīva śaśilekhā kiṃ citraṃ tiṣṭhasi nirbhayā

kasyeyaṃ nagarī kasmāc chūnyā sarvatra vartate /
atredaṃ patitaṃ kasya vartate ca kalevaram"

sā taṃ jagāda "gandharvarājasyāsau mahāpurī /
sundarī patihīneva vidhuhīneva śarvarī

sa cāmātyais samaṃ sarvaiḫ pātuṃ Kaśmīramedinīm /
avatīrṇaḫ paristhāpya nijam atra kalevaram

Śāhābadena iti yaḫ prathito 'sti jagattraye /
tatkalevararakṣārtham atra tiṣṭhāmi kevalā

sa ca niṣpāditāśeṣakāryo māsatrayāntare /
svām imāṃ nagarīm eva dhruvaṃ rakṣitum eṣyati"

prabuddho 'bhyadhikāścaryaśokacintārasāntare /
majjann avarṇayad rājñe svapnavṛttim akhaṇḍitām

"asatye kiṃ bhayaṃ svapne satye tv aiśvaryam eva me" /
itthaṃ tad vimṛśan rājā na tathā paspṛśe śucā

"madantikam upāgamyam" iti bhūmipatis tataḥ /
dūrasthitānāṃ putrāṇāṃ sadyo lekhān visṛṣṭavān

tato mumūrṣur bhūpālo Hindukānāṃ nije pade /
aprāptatanayo dhīmān abhyaṣiñcat svayaṃ tataḥ

[Ps-JRT 43]
taṃ bhaktaṃ nEśvaro 'naiṣīt sadehaṃ yat sadharmatām /
tatra hetur dhruvaṃ tasmin saubhāgyān Madanabhramaḥ // JRt_B.534 //
śauryaudāryavidhau vidhautavividhaśloke nṛlokeśvare tasminn astam upāgate guṇigaṇatrāṇoccarannaipuṇe /
Śakreṇonnamitaṃ śiraḫ paribhavatrāsāpasārād dhruvaṃ bhūbhārodvahanāt punar vinamitaṃ śeṣeṇa śokaspṛśā // JRt_B.535 //
pratyakṣaṃ jvalataḫ pratāpaśikhinas svīkṛtya yāṃ bhuktavān nānyān ādriyatādhikaṃ spṛhayatas tadrāgabandhāc ca yā /
tāṃ bhūmiṃ pravihāya hāyam agamad dyāṃ Śakrabhuktāṃ ciraṃ puṃsāṃ strīṣu kadāpi na prabhavati premagrahapratyayaḥ // JRt_B.536 //
jyaiṣṭhaśuklacaturdaśyāṃ tānāṅke 'bde mahīpatiḥ /
āliṅgya nākavanitās stanaunnatyam apīphalat