Rājataraṅginī · Verses 41-60

dātuṃ bhoktum anīśasya śrotriyasyeva sampadam /
PrayāgaJanakau dhūrtau rājño mumuṣatuś śriyam

tau hi svabhṛtyair nissatyau kāritai rākṣasākṛtim /
tam atrāsayatāṃ rātrau rātrau citreṇa karmaṇā

mithyātmanīnatāṃ tasya nāṭayantau kumantriṇau /
"rakṣāsūn" iti tau vittaṃ tyājayām āsatur nṛpam

sthāne Bhiṣāyakasyaitāv ādiśya svānujīvinam /
tṛṇacchannaṃ mahāratnaiś caitryāṃ pūjayatas sma tau

sa punaẖ kṛtasaṅketaḫ paśyatsv atha janeṣv aho /
rājñaẖ kṛtvāśiṣaṃ rātrau sālaṅkāro yayau vanam

"Bhiṣāyako baliṃ yat te gṛhītvā vyadhitāśiṣaḥ /
nirvighnaṃ bhāvi tvadrājyam" iti tau bhūpam ūcatuḥ

[Ps-JRT 1]
Bhiṣāyakadine bhṛtyaṃ svaṃ kṛtvā tau Bhiṣāyakam /
ratnair abhyarcya vipinaṃ nītvātha pratyamuñcatām // JRt_B.47 //
"Kuberas tvayi tuṣṭo 'dya nānāratnavibhūṣitaḥ /
kṛtvā tavāśiṣaṃ lokasamakṣaṃ sa tirohitaḥ" // JRt_B.48 //
ity uktvā bhūpates mugdhasya kṛpaṇasya ca /
PrayāgaJanakau dhūrtau prasādaṃ pratyadāpitām // JRt_B.49 //
evaṃ kadīśvarasyāsya bālasyeva vibhīṣikāḥ /
sandarśya kośaṃ niśśeṣaṃ luṇṭhayāṃ cakratur viṭau

rājā sārdhān navābdān sa kṣmāṃ bhuktvā divasān daśa /
catvāriṃśābdanābhasyasitāṣṭamyāṃ layaṃ yayau

3) Vantideva (LS 4240-4247)
Vantidevābhidhas saptacatvāriṃśe 'tha vatsare /
bhādraśukladaśamyāṃ sa tasya putro vyapadyata

4) Voppadeva (LS 4247-4256)
Voppadevābhidhaḫ paurair yogyālābhān nṛpaẖ kṛtaḥ /
prāpito ghāsaracitaḫ pūjām iva Bhiṣāyakaḥ

dṛṣṭvā sthūlaśilā hṛṣṭo mūḍhas so 'tha svamantriṇaḥ /
ādiśat "stanyapānena vardhyantām itarā" iti

śrutvā tatsthānamāhātmyaṃ bāliśo mantribhis saha /
āgāt Sureśvarīkṣetraṃ naupathena sa jātucit

apsu svapratibimbe 'sya kurvato mukhavaikṛtam /
ruṣā capeṭāṃ dadato nyapatan maṇimudrikā

"rājñaẖ kva maṇimudre"ti pṛcchatas so 'bhyadhād iti /
"patitā sā jale rekhā tatrābhijñānam" ācaran

evaṃ nidarśanībhūya mūrkhāṇāṃ nāmarājatāṃ /
navābdāṃś caturo māsān sārdhān dve ca dine vyadhāt

5) Jassaka (LS 4256-4274)
tasyānujo 'tha bhūbhāram anicchann api Jassakaḥ /
svavṛddhikāmair atyajño Lavanyair abhyaṣicyata

badhyante na śukā ivoditavacassaṃvādino vāyasā
bhūmiś śarkarilorvareva bhajate no gharṣaṇakṣodanam /
aśmā saindhavavan na jātu gamito niṣpiṣya cūrṇīkṛtiṃ
keṣāñcid guṇavad guṇāya mahate doṣo 'pi sañjāyate

sodarau KṣukṣaBhīmākhyau dvijau tasya mahībhujaḥ /
dhūrtatvena priyāv ājñām acirād udalaṅghatām

"samarthāv atisāmarthyau sa kathaṃ nau sahiṣyate" /
bhūpaṃ matvāpi sāmarṣaṃ nānyaṃ vavratur ity amū

svayaṃ yac ca na saṃbheje tayor eko nṛpaśriyam /
Lavanyotsiktatā hetur na tv anaucityaśaṅkitā