Rājataraṅginī · Verses 21-40

paśyantu matkāvyam iti ciraṃ dūraṃ gatā kaveḥ /
antaḫparamukhaprekṣibhāvadainyakadarthanā

samas syād apravīṇānāṃ gītasaṃskṛtayo rasaḥ /
vānarā yuñjate guñjāś śīte vahnikaṇabhramāt

kāvyaṃ śrutam api prītyai nābodhopahatātmanām /
hīnadantabalasyekṣur mukhe nyastaẖ karoti kim

padārthasundare kāvye darśite nirmalātmanām /
durvāraṃ guṇaratnānāṃ matsarapratibimbanam

lakṣmaṇā dūṣayann induṃ budhaṃ matsarayakṣmaṇā /
vidhātā vācyatām eti parodrekāsahāgraṇīḥ

madvāk Kalhaṇakāvyāntaḫpraveśād etu carvaṇam /
naḍvalāmbu sarittoye patitaṃ pīyate na kim

1) Jayasiṃha (LS 4203-4230)
jagadānandano devadvijātikṛtavandanaḥ /
kṣitiSaṅkrandanas śrīmān āsīt Sussalanandanaḥ

gajarājaikavāhatvaprasiddhim api bibhratī /
Jayasiṃhābhidhāne Śrīś citraṃ yasmin sadāvasat

Vāgdevyā lālite mātrā Śriyo bhoktari bhūpatau /
tayoś śvaśrūsnuṣātvena naivādarśi virodhitā

Trigartādhipater vaśyaṃ Mallaṃ jātu Suśarmaṇaḥ /
vairinirvāsitaṃ prāptaṃ vṛttikāmaṃ nṛpo 'grahīt

sarvatrauṣadhayas tṛṇāni maṇayo grāvāṇa evākhilair manyante guṇino digantaragatās tāvaj janāḫ prākṛtāḥ /
yāvan naiva nayanti karmabhir abhidhyeyaprakarṣaprathaiś citraprāyadaśaiś ca nirmalam atisphāraṃ janaṃ rañjanam

Vasudhāvāsave yāte jetuṃ Yavanamedinīm /
sainyasya vallabho Mallaś śauryodrekād athābhavat

hataśeṣaṃ Turuṣkeśasainyaṃ tulayituṃ niśi /
śibiraṃ Mallacandro 'gād ripūṇāṃ sāhasorjitaḥ

yatra na prāviśad vāyur bhītyeva subhaṭair vṛte /
dhruvaṃ mantrauṣadhibalāt praviśyātra balāntare

suptadrohāṃhaso bhīter anighnan Yavaneśvaram /
upānahau svanāmāṅke nināyāsya śirastratām

upānahau parijñāya gṛhītvā cātha so 'py ariḥ /
bhūpateś śibiraṃ yātaś śriyaṃ kīrtim ivādita

dve mūrtī tapanānalāv atha tathā Śaṃbhoś śaśāṅkāmbhasī netā hanta mitho gatānugatiko lokas tulāṃ tāṃ dvayīm /
sūryācandramasor yathāsvam upalaiẖ kāntair viśeṣaṃ paraṃ teṣāṃ tatpratiyogyasambhaviguṇair labdhā jano 'rocakī

triṃśe 'bde phālguṇe kṛṣṇadvādaśyāṃ bhūmivallabhaḥ /
svasaubhāgyena divyastrīdṛśam aprīṇayattarām

2) Paramāṇuka (LS 4230-4240)
athābhyaṣeci tatputro jaḍais sa Paramāṇukaḥ /
aṇīyaḫpattravistāraiẖ kundo māghadinair iva

avadhūya prajātrāṇam avadhīrya ca digjayam /
kartuṃ prārabhatākhinnaṃ rājā kośasya sañcayam