Rājataraṅginī · Verses 361-380

rājñi Śāhābadene 'tha smaraṇaṃ kṣitir atyajat /
Lalitādityasampattivipattisukhaduẖkhayoḥ

[Ps-JRT 29]
śrīmān Śāhābadeno 'tha prājyaṃ sāmrājyam agrahīt /
yena rājanvatī bhūr dyām ahasat tadyaśomiṣāt // JRt_B.416 //
grīṣmārkaṃ dyaur ivānyartūn rājño 'tītya bahūn mahī /
dhruvam āpaj jayāpīḍam etaṃ na tu sa kilviṣī

pūrve pare ca bhūpālā nāyakeneva bhūṣitāḥ /
kṣmānāyakena tenātha muktāguṇalasacchriyā

[Ps-JRT 30]
sindhau vāḍavataptāmbuny api bimbitam ambaram /
yatpratāpāgnitāpārtaṃ majjatīva divāniśam // JRt_B.419 //
tadīyo jayalakṣmībhiḫ praviṣṭābhiḫ pade pade /
na pratāpānalo 'tṛpyat saridbhir iva sāgaraḥ

jayaṃ vinā gaṇayataẖ kṣaṇamātraṃ vṛthā gatam /
vṛddhasya taruṇīvābhūd yātrā tasyātivallabhā

na mṛgākṣī na vā śīdhupānalīlā na candrikā /
yātraiva kevalaṃ tasya bhūmibhartur mano 'harat

na tāpo na himaṃ tasya na sandhyā na niśā tathā /
na kṣun na vā pipāsā ca rājño yātrām avighnayat

na sarid dustaratarā durāroho na parvataḥ /
durlaṅghyo na maruś cābhūd yātrāyāṃ māninaḫ prabhoḥ

ajitāṃ pūrvabhūpālaiḫ Pārasīkakulākulām /
uttarāśāṃ vijetuṃ sa prasthānaṃ prathamaṃ vyadhāt

jagatāṃ vijayī Kāmo madhuśīdhuvadhūr iva /
CandraLolakaŚūrān sa sahāyatve 'vṛṇot prabhuḥ

sainyacetāṃsi sattvena tamasā svavirodhinaḥ /
apūrayat sa rajasā digantān uddhatāntakaḥ

praviṣṭaṃ tasya Govindakhānapālanaśālini /
Udabhāṇḍapure pūrvaṃ bāṇais tadanu sainikaiḥ

śailaśṛṅgaṃ nṛpānīke prāpte tasya virodhibhiḥ /
bhayāturair avārohaś śṛṅgāt tuṅgād vyadhīyata

sadṛśaṃ prābhṛtaṃ dātum asamartho 'sya Sindhupaḥ /
upadhīkṛtavān kanyāratnaṃ ādāya bhūpateḥ

rājñas tu gauravaṃ bāhau Gāndhārāṇāṃ bhuvoḍhayā /
citraṃ tu lāghavaṃ teṣāṃ bhayabhārānuṣaṅgataḥ

bhaṅgas tuṅgasya śṛṅgasya khaḍgānāṃ naiva bhūbhujā /
Śiṅgānām api deśe 'smin vihitaś śauryaśālinā

ākarṇya rājasiṃhasya siṃhanādamayīṃ camūm /
madaṃ tatyāja caskhāla bibhāya Gajinīpurī

[Ps-JRT 31]
snātaṃ raktair dviṣāṃ bhuktaṃ prāṇavātair mahītale /
vratasthābhir ivāsvāpi tasyāho dhīrahetibhiḥ // JRt_B.434 //
ŚrotriyaKṣatriyair Aṣṭanagare 'rodi śāmyatoḥ /
taruṇāgnipratāpāgnyor dhūmeneva bhayāturaiḥ

yaśasā saha sampattiṃ tasmiṃl luṇṭhayati prabhau /
prāpat Puruṣavīrākhyadeśākhyā rūḍhiśabdatām

dattavāṣpanivāpāmbhoNagarāgraharastriyaḥ /
jīvatas svasya patyuś ca piṇḍau stananibhād daduḥ