Rājataraṅginī · Verses 381-402

aśvapāleṣu gacchatsu ghoṣadhātutaṭacchalāt /
Udakpatitiraskārapraśastiṃ sa vyadhāt prabhuḥ

tato vyāvṛtya gacchan sa dakṣiṇāśāṃ svavājinām /
mārgakhedocitaṃ tāpaṃ Śatadrūvāriṇāhanat

Ḍhillīm ulluṇṭhya tatkālam Udakpatim upāgatam /
mārgarodhena nṛpatir nitāntam udavejayat

[Ps-JRT]
Yoginīpurapaurān yān dhāṭyānaiṣīd Udakpatiḥ /
mārgadānopakāreṇa sa tān adita bhūbhuje

turaṅgavastradānena sa tān sammānya bhūpatiḥ /
svadeśaṃ prāhiṇot kīrtirāśīn mūrtān bahūn iva

Suśarmapurarājena tasmāt svāśarmaśaṅkinā /
durgāhaṅkāram utsṛjya Devy eva śaraṇīkṛtā

[Ps-JRT 32]
tatpratāpānalaḫ pītvā Kedārāśrayiṇāṃ rasam /
jātānāṃ śivaliṅgānāṃ vata bhaṅgam adarśayat // JRt_B.444 //
svayaṃ natyā na tūnnatyā Bhauṭṭānām asya bhūpateḥ /
arvatāṃ parvatārohadohado vinivāritaḥ

dustaratvāt taṭasthasya devatābhis tanūkṛtaḥ /
Sindhvogho nṛpater evaṃ pūrvebhyaś śrutam adbhutam

evaṃ nityajayodyogāt svadeśaḫ paradeśavat /
paradeśas tu tasyāsīt svadeśa iva bhūpateḥ

pratāpeneti sampādya diṅmukhe tilakaśriyam /
vyadhāt praviśya Kaśmīrān sa paurān ayanotsavam

tasya varṇayatāṃ śauryaṃ prasaṅgād atimānuṣam /
Asmākaṃ cāṭukāritvaṃ jñāsyate bhāvibhir janaiḥ

yātrāyātaẖ kadācit sa dūradeśe mahīpatiḥ /
apsarassadṛśīṃ kāñcic chrutavān hariṇekṣaṇām

nijānugān vañcayitvā rājā yuktyā kayācana /
athaikākī sa taṃ deśam aviśad bhogalālasaḥ

narmaṇā mohayitvā tāṃ dvitīya iva manmathaḥ /
manorathān asiñcat sa tadoṣṭhāmṛtapānataḥ

apaśyantas tam āśaṅkya hataṃ kenāpi vairiṇā /
atha kopabhramāveśam udbhaṭās tadbhaṭā yayuḥ

anviṣyadbhis tam aśvena nibaddhenāṅganād bahiḥ /
samabhāvyata tai rājño vairibhir nirjayaẖ kṛtaḥ

śauryasvāmyanugābhyāṃ tu vidhātuṃ yuddham udbhaṭaiḥ /
tadbhaṭais sadanaṃ ruddham abaddhakavacāntaraiḥ

atrasadbhiś ca tatsiṃhanādapūrṇāt tataḫ purā / 398ab /
[Ps-JRT]
kṛtāskandeṣu śūreṣu śatrubhir vipinaṃ gatam // 398cd //
athāśvāsya priyāṃ tāṃ tu śatrūn matvā samāgatān /
svaśauryaṃ saphalīkartuṃ yoddhuṃ rājā viniryayau

Śāhābadenam ālokya taṃ teṣām anujīvinām / 400ab /
cittaiḫ prītyā mukhair bhītyā nītyā mūrdhabhir ānatam // 400cd //
evaṃ sa svajayastambhayūpān raṇamakhān bahūn /
hatavairipaśūṃś cakre svapratāpānalārciṣaḥ

svadeśe mantriṇos tasya KoṭabhaṭṭOdayaśriyoḥ /
samareṣu bharas tv āsic CandraḍāmaraLolayoḥ