Rājataraṅginī · Verses 341-360

pathikānām nivāsāya tena parvatasīmani /
kakṣyāvibhāgasahitas svanāmnā racito maṭhaḥ

[Ps-JRT 25]
kapaṭāpattrapāropād rājñaḫ prāptavibhīṣakaḥ /
svayaṃ dvāraṃ tyajan so 'gād grāmaṃ Jyeṣṭheśvarābhidham // JRt_B.391 //
evaṃ vikramanītibhyāṃ deśaṃ śodhayato nijam /
śrīŚiraśśāṭako rājño dvāraiśvaryam avāptavān

tasya rājño 'bhavat putro nāmnā Śāhābhadenakaḥ /
balabuddhikṣamāśauryamantrotsāhaguṇair yutaḥ // *26 //
rājaputras sa Vākpuṣṭāṭavīṃ līlārasād aṭan /
yoginīcakram adrākṣīt kadācid girigahvare

Udayaśrīs tathā Candraḍāmaraś cāsya vallabhau /
apaśyatāṃ na kiṃ labhyaṃ mahatām anuyānataḥ

acalal lāḍanādaṇḍaghaṇṭānāṃ caṇḍaṭāṅkṛtam /
manāṃsi na punas teṣāṃ vīrāṇāṃ sāhasaspṛśām

[Ps-JRT 26]
ghaṭitāśātaṭasvāṭṭahāsasaṃvāhanādibhiḥ /
yoginyo ḍamarudhvānair bhayād iva calair babhuḥ // JRt_B.396 //
māntardhāsiṣur evaitāḫ praṣṭuṃ draṣṭuṃ ca kāṅkṣitāḥ /
iti te 'śvād avārohan pravīrā na tu tadbhayāt

śanaiś śanais tato yānto maunapūrvaṃ mahāśayāḥ /
yoginīnikaṭaṃ prāpur vikaṭaprakaṭaujasaḥ

yoginīnāyikā dūrāt parijñāya nṛpātmajam /
sāśiṣaṃ śīdhucaṣakaṃ prāhiṇon mantritaṃ tataḥ

Candras tad amṛtaṃ tṛptibhājā rājñāvaśeṣitam /
Udayaśrīmukhāpekṣī na saṃtṛptim aśeṣayat

bhavitavyabalād aśvapālaṃ sapadi vismaran /
Udayaśrīr aśeṣaṃ tat pītvā tṛptiṃ parām agāt

āścaryatṛptanetreṣu teṣu tṛpteṣu yoginī /
nimittajñāvadad rājaputraṃ baddhāñjaliṃ tataḥ

"akhaṇḍaṃ bhāvi te rājyaṃ Candras tvadvibhavāṃśabhāk /
ājīvam Udayaśrīś ca maṇḍito 'khaṇḍayā śriyā

aśvapālas tv asāv asmadanugrahavivarjitaḥ /
acireṇaiva kālena nūnaṃ prāṇair viyujyate"

bhaviṣyat sūcayitvaivaṃ yoginībhis samanvitā /
sāntardadhe puraḫ prāṇāḫ paścāt turagapālinaḥ

avicāratamomagnāñ jantūn uddhartum īśvarāḥ /
sambhavanti prajāpuṇyaiḫ prakāśotkarṣahetavaḥ

śvaśurād bhartṛbhāgaṃ yad avīrā puṃścalī vadhūḥ /
haranty āsīt sa taṃ rājā durācāraṃ nyavārayat

[Ps-JRT 28]
Kāṣṭhavāṭāgatān Rājasthānīyān vyūhatatparān /
yuktyānīya mahīpālo baddhvā rājyaṃ sukhaṃ vyadhāt // JRt_B.408 //
Koṭarājasya jāmātuẖ kārāvāstavyatāṃ vyadhāt /
bhītyā pratyaham evātha jīvanmṛtyum avārayat // JRt_B.409 //
bubhuje Kṣemarājaśrīsvasthāṃ śastranakhaiś śataiḥ /
vidārya Khaṭikābhūmiṃ rājā saukaryabhājanam // JRt_B.410 //
Jayāpīḍapure kṛtvā rājadhānīṃ mahāmatiḥ /
śrīRiñcanapure cakre rodham Buddhagirābhidham

ekonatriṃśe 11 varṣe 'tha duṣkṛtodbhavam adbhutam /
durbhikṣaṃ kṣobhayām āsa lokaṃ śokākulaṃ mahat

māsān aṣṭau dvādaśābdāṃs trayodaśa dināni ca /
kṣmāṃ bhuktvā triṃśavarṣe 'tha caitre rājā vyapadyata

19) Šihāb ad-Dīn (LS 4430-4449)
mandarājakathākhyānāj jaḍimā vāci saṃstutaḥ /
tīkṣṇapratāpaŚāhābadenākhyānād vinaśyate