Rājataraṅginī · Verses 321-340

āgate vigrahe vyaktiṃ Rājasthānīyasaṃśrayāt /
so 'gād Avantinagaraṃ tanmūlasthānam uddhataḥ

athOtpalapuraṃ rājā bhaṭais saha raṇodbhaṭaiḥ /
aśiśrayad idaṃ bhrātur vācikaṃ ca visṛṣṭavān

"durjanapreraṇāt tvaṃ cen matsnehaṃ nābhyajīgaṇaḥ /
lokāpavādajvarataẖ kathaṃ kampo na jāyate

anyo'nyapālanāyājñāṃ rājñas tridivagāminaḥ /
pālanīyām anudhyāya pratyānaya dayāṃ mayi"

iti sandiśya dūtaṃ ca vyasṛjat sa nareśvaraḥ /
kampanādhipatiṃ hantuṃ vyasṛjac ca nijātmajam

"mṛgayāṃ yuvarājo 'gād" iti dūtaṃ nyarodhayat /
bhrātṛputraṃ nihantuṃ ca śrutadroho 'gamac ca saḥ

"dūtaẖ kim iti nāyātaẖ kālo hi suciraṃ gataḥ" /
iti cintākulo Lakṣmabhaṭṭo rājāntikam yayau

ūce ca "jāne sa drohaṃ lakṣayitvā tavānujaḥ /
tvatputramāraṇāyāgād yad dūtasya cirāgamaḥ

snāti bhuṅkte svapity eva yuvarāja iti cchalāt /
tvadudyoganiṣedhāya nūnaṃ ruddho vacoharaḥ

tad Avantipuraṃ tasmiñ śrīDevasarasaṃ gate /
sadyo nissvāmikaṃ hanmo jayo 'smākaṃ tato dhruvaḥ"

athĀvantipuraṃ gatvā sattvātiśayaśālinā /
rājñā yuddhaṃ tathākāri tadbhaṭair udbhaṭais samam

Alleśirāya bhṛtyānāṃ vadhaṃ nūnaṃ niveditum /
Vitastā śavaruddhaughā pratīpam agamad yathā

bhrātṛputraṃ parābhūya tāvad Alleśire drutam /
vyāvṛtte raṇakhedārtaḫ prapalāyata Jyaṃśiraḥ

[Ps-JRT 23]
dīpasyeva śikhā dhvānte yasya dhīr āpadi sphuret /
sa ratnaṃ ratnajāteś ca pāṣāṇebhyaẖ kim antaram // JRt_B.381 //
samadhitsata bhedāya kañcit kālaṃ sa vairiṇam /
amoghā dūragā buddhiś śastrāṇy apy ativartate // JRt_B.382 //
anayor "naiva kartavyaẖ kalir māsadvayīm" iti /
rājñā samaṃ vidāṃ cakre dhīmān Alleśiras tataḥ

pratimucya nijān yodhān Avantipuram utsṛjan /
atha Kṣīrīpathenāsāv Alleśo 'gamad Ikṣikām

nagarīrakṣitāṃ nyasya Sayyarāje svamantriṇi /
Kramarājyaṃ virājacchrīr Jyaṃśiraś cāgamat tadā

dānamānau pratiśrutya Sayyarājaṃ vibhindatā /
yuvarājena nagarī svīkṛtā mantrayuktibhiḥ

nāmarājatayā duẖkhaṃ bhuktvā Kaśmīramaṇḍale /
māsadvayonau dvau varṣāv avasānam agān nṛpaḥ

18) ‘Alā' ad-Dīn (LS 4420-4430)
jānann Alāvadeno 'tha taṃ kālaṃ kalahākṣamam /
dvāraiśvaryaṃ dadau bhrātus sadyo vighnanivṛttaye

salilottaraṇopāyaṃ setuṃ Suyyapure vyadhāt /
vipatsantaraṇopāyaṃ na punar Jyaṃśiro 'smarat