Rājataraṅginī · Verses 281-300

"bhavannandanasaṃrakṣāparāv etāv ubhāv api /
tayor anyatamaṃ dvārīkṛtyānyam aharad vidhiḥ

pramītadvijaśokotthatāpaśāntyai jaḍaḫ param /
paraprāṇān roṣavahnau pradīpte juhuyād" iti

Śāhmeraṃ roddhukāmāṃ tāṃ samarthām api durdhiyaḥ /
Koṭādevīm amātyās svā naye buddhiṃ nyavārayan

kedāram iva kulyā sā pānīyena maharddhinā /
lokam āpyāyayām āsa sāmrājyotpalacandrikā

ājñāvyatikramāj jātu kampanādhipatiṃ prati /
yuyutsur akarod yātrām amitrābjaśaśiprabhā

saṅkaṭāt kampaneśas tāṃ kulāyād iva pakṣiṇīm /
jīvagrāhaṃ gṛhītvātha kārāpañjaram ānayat

mantrī Kumārabhaṭṭākhyas tasyās sacivapuṃgavaḥ /
tanmokṣasiddhaye 'kārṣīt tadāmātyaiś chalāt kalim

rājñyāḫ puṃbhāvamātreṇa bhinnam ākārasannibham /
kamaṇḍalukaraṃ kañcit so 'dhād vidyārthinaṃ śiśum

gatvā sa kampanādhīśaṃ dhīpraśaṃsāvimaṇḍitaḥ /
sauṣṭhavaudāryasampattiśālinīṃ vācam abhyadhāt

"svaśiro malinīkṛtya jīvatāṃ yoṣidājñayā /
puruṣatvaṃ tvayā svāmin kṛtārthīkriyate 'dya naḥ

[Ps-JRT 14]
strītvāt kātaracittāyā dānabhogotsavadviṣaḥ /
rājñyā bandhuṣu sainyāntar draviṇaṃ vartate mahat // JRt_B.327 //
gatvā tvadājñayā kārāṃ tasyās tarjanasāntvanaiḥ /
dhanaṃ janas tvadīyo 'yaṃ svāmisātkartum icchati

strītvād aśaktā dātuṃ sā samacaiṣīd dhanaṃ yataḥ" /
vyasṛjat kampaneśas taṃ kārām evaṃ vimohitaḥ

kārāyā nirgamiṣyantīṃ devīṃ Koṭām ivekṣitum /
tatkālam eva sandhyāgāj jagadrañjanakovidā

sandhyāvandanayogyāmbuvāhinā vaṭunā saha /
asau kārām avikṣac ca rājñyāś niraguś śucaḥ

rājñīveṣabhṛtaṃ tatra sthāpayitvā vaṭuṃ sa tam /
tadveṣadhāriṇīṃ Koṭām anvādāya viniryayau

rakṣitāro 'pi nājānaṃs tad yāvat tāvad eva sā /
kampanādhipatiṃ cakre svacakrebhaśakṛtkarim

sā brāhmaṇaKumāreṇa mocitā bhaṭṭaBhikṣaṇāt /
ekadantahatāreẖ kiṃ nānyenebhamukhād bhavet

tayānapodito 'py aujjhi Śāhmero naiva śaṅkayā /
kṛtavairās samarthena prājñā naiva hy udāsate

na prāsīdan na cākupyat tasmin sā balaśālini /
ghṛṇā pramādasahitā vināśaprathamāṅkuraḥ

[Ps-JRT 16]
devyā vāsaṃ vimuñcantyās tasyā dhanarasāśrayam /
Śāhmere viṣavallīva drohadhīr abhyavardhata // JRt_B.337 //
vardhano 'nyatarasyābhūt pakṣo 'nyasya kṣayāvahaḥ /
KoṭāŚāhmerayor asti kṣitimārutayor iva // JRt_B.338 //
Jayāpīḍapuraṃ yāntyāṃ tasyāṃ kāryānurodhataḥ /
Śāhamero balī jātu nagaraṃ svīcakāra saḥ