Rājataraṅginī · Verses 261-280

Śāhamerāmbupūreṇa kāmanollāsaśālinā /
ākrāntaḫ parito rājā mṛdrāśisthadrumopamaḥ

puramātrādhipatyotthalajjayeva mahīpateḥ /
jīvitaṃ dūram agamac chuddhena yaśasā samam

śivarātritrayodaśyāṃ varṣe rājā caturdaśe /
kṣamāvān sa kṣamām aujjhīc Śāhmerasparśadūṣitām

[Ps-JRT 12]
abdān pañcadaśa dvau ca māsau dvau vāsarāv api /
kaśmīrakāśyapībhogam akārṣīt sa mahīpatiḥ // JRt_B.298 //
15) Koṭā Devī (LS 4414-4415)
atha Śāhmerabhītyā śrīKoṭā catvāry ahāni sā /
gūḍheṅgitānayad guptiṃ bhūpālapramayādikam

"Śāhmero matsutadvārā sāmrājyaṃ svīkarotu mā" /
iti jyāyāṃsam utsṛjya bālatvāc ca paraṃ sutam

putrasnehena vṛddhatvadoṣeṇa ca vimohitā /
avaruddham anicchantī śrīKoṭā mahiṣī tataḥ

strībhāvād bandhubhāvāc ca Lavanyair upabṛṃhitā /
asāntvayat svayaṃ bhūmiṃ vidhavāṃ svāṃ sakhīm iva

[Ps-JRT 13]
sā rājñī śuklapratipadvītabhītā bhavanty atha /
rājānaṃ gurubhis svīyaiś carameṣṭim avāpipat // JRt_B.303 //
pūrvopakārasmaraṇāc Chāhamerādayo 'khilāḥ /
tāṃ prāṇamann amātyās svāṃ cāndrīm iva navāṃ kalām

śamayantyā rajas sarvaṃ tāpāpahatidakṣayā /
tayā nidāghavṛṣṭyeva latās saṃvardhitāḫ prajāḥ

Śāhmerāt svodayabhraṃśaśaṅkinī bhaṭṭaBhikṣaṇam /
tadudrekavināśārthaṃ mānaṃ devī nināya sā

dustareṣu mahābhītijalapūreṣu sā tataḥ /
tatprajñānāvam āruhya kāryapāraṃ paraṃ yayau

antas sehe na Śāhmeras taddattaṃ Bhikṣaṇodayam /
mānavantas sahante hi cchāyāsāmyaṃ kathañcana

vartate dhūmatāpādilakṣaṇaṃ jātavedasaḥ /
dhīmato 'sya na kiñcit tu roṣaliṅgam alakṣyata

chalābhinītarogeṇa Śāhamereṇa dhīmatā /
pratyāsannavināśatvam ātmanas samakathyata

tasyātha pratyavekṣārtham Avatārādibhis saha /
vyasarji Koṭayā devyā sa śrīmān bhaṭṭaBhikṣaṇaḥ

"svedaẖ kupitapittasya hito no ve"ti vādibhiḥ /
sampraveśān nyaṣidhyanta dvāssthais tadanuyāyinaḥ

tau BhikṣaṇĀvatārau dvau tatsamīpam avikṣatām /
sāṅkaṭyād iva tatprāṇarakṣiṇyo devatā na tu

anuyuktāmayodantas sa kālena tayor nijaiḥ /
gātre nyakhānayac chastrīr ādhīn svasyodakhānayat

sirābhiś śoṇitaṃ vāṣpaṃ dṛśāṅgais sakalair asūn /
tau dvāv amuñcatāṃ sadyas taddveṣaṃ sa ca cetasā

tad eva vraṇadīpārkapūrṇapātrārdhatacchiraḥ /
rogamokṣocitaṃ snānaṃ sa tayoś śoṇitair vyadhāt