Rājataraṅginī · Verses 241-260

udayādribhuvā pūrṇaś śaśīvātha sa Koṭayā /
Kheriñcanatamonāśī śirasādhāri sādaram

yaṃ Koṭāsūta Jaṭṭākhyaṃ Bhikṣaṇākhyasya mantriṇaḥ /
vardhanāyātmajaṃ rājā sa taṃ mṛtyum ivādita

Śāhameras sa vīro 'tha paripālitaRaiñcaniḥ /
acakṣuṣyaẖ kṣamābhartuḫ putrapremabharād abhūt

devyās tu samadṛṣṭitvāt putrayor ubhayor api /
rājño dveṣyo 'pi Śāhmero na bhayena sa paspṛśe

Acalopaplavātaṅke bhayāl lokais samāśritaḥ /
Śāhmeraś sa rājānaṃ na tṛṇāyāpy ajīgaṇat

Śāhmero Haydaraśyenaṃ darśayitvā muhur muhuḥ /
abhāyayattarāṃ rājapakṣiṇaṃ taṃ divāniśam

rakṣaṃs taṭasthān udvegarahito jalavarjitaḥ /
Alleśvarāmbupūras sa prajāś citram atārayat

ŚiraśśāṭakaHindākhyau samabhūṣayatām ubhau /
candrārkāv iva tasyāśāṃ śūrau pautrau guṇocchritau

dvāraiśvaryāt sphuraddarpo rājājñālaṅghanodyataḥ /
Śāhmeras sa vipaddvāram abhūd bhūpatisevinām

so 'lleśirasutāṃ dattvā Lustasya tadadhīśituḥ /
srīŚaṅkarapuraṃ jitvā rājñaś śaṅkām avardhayat

vaśe Telākaśūro 'sya Bhāṅgilaiśvaryabhājanam /
Jyaṃśirasya sutāṃ hastekṛtya kṛtyavido 'bhavat

Bahurūpajayī lakṣmīnidhir acyutatāpadam /
Śamālāṃ sa nṛsiṃho 'tha daityaśriyam ivādunot

makarālayagāmbhīryaẖ karālambo jayaśriyaḥ /
Karāle sa karālaujāẖ karam ālambayaj janān

asismarat smerayaśā dahyamānam itas tataḥ /
rājñaẖ Kalaśadevasya Vijayeśapuraṃ tataḥ

sthityai prakalpya cakrasya svasya Cakradharācalam /
Śāhmero 'calakāryāṇi janasya samadarśayat

kampaneśvaralakṣyasya Lakṣmīsarvasvatāṃ dadat /
citraṃ sa labdhavāñ śuddhaṃ sudāyam iva sadyaśāḥ

narendraraṅgaśailūṣaṃ Koṭarājam athāgrahīt /
Śāhmeras tanayāratnagrahaṇonmānakena saḥ

sāmnā kecit pare daṇḍād dānād anye pare bhayāt /
mānyatām anayan dhanyā Lavanyās tasya śāsanam

Lavanyalokas tatputrīr mālā iva babhāra tāḥ /
nājānād bhujagīr ghoraviṣāḫ prāṇaharīḫ punaḥ

rājabījividheyatvān mantrād vikramataś ca vā /
kaś Śāhmeraharer nābhūl Lavanyadvirado vaśe