Rājataraṅginī · Verses 221-240

14) Udyānadeva (LS 4399-4414)
putraṃ Haidaranāmānaṃ bālyād anabhiṣiktavān /
atathāvidhaśaktitvād rājyaṃ svenāpy asaṃvahan

Lavanyaiẖ kulanāthatvād Riñcane pratighād api /
avyāhatapraveśāśo matimāñ Śāhamerakaḥ

samaṃ śrīKoṭayā devyā mūrtayeva jayaśriyā /
tadOdayanadevaṃ taṃ Kaśmīrakṣmām alambhayat

rājyalakṣmīmahādolā guṇabaddhā garīyasī /
Riñcanoccaiḫpadaṃ gatvā rājādhaḫpadam aśrayat

rājā Śāhmeraputrau tau JyaṃśirĀleśirau tadā /
Kramarājyādideśānāṃ svāmyadānād arañjayat

dhīr ivāsīt tadā Koṭā devī sarvādhikāriṇī /
rājā deha ivātyarthaṃ tadādiṣṭaṃ samācarat

tejasā pihitāny āsan yāni Riñcanabhāsvataḥ /
Lavanyajyotiṣāṃ rājapradoṣe 'bhūt tadodayaḥ

yasyākramyata saumyasya gṛhiṇyā Koṭayā gṛham /
viṣayākramaṇaṃ tasya Lavanyaiẖ kiṃ nu śocyate

Lavanyadeśacaṇḍālagṛhasparśavivarjakaḥ /
sa śrotriya ivānaiṣīt kālaṃ snānatapojapaiḥ

āstikatvaṃ kiyat tasya varṇyate varṇadhāriṇaḥ /
krimimardabhayād ghaṇṭāṃ yo 'badhnād vājino gale

tāvad draviṇatām eva kośālaṅkaraṇaṃ dadhat /
kaṇṭhabhūṣāṃ samauliṃ sa Cakriṇe 'dita kāñcanīm

atha Mugdhapurasvāmidattānīkinyahaṅkṛtaḥ /
Kaśmīrān Acalo 'vikṣad balād Ḍalca ivāparaḥ

svapakṣair ākṣipaty āśā balenākramya medinīm /
nĀcale gotrabhittvaṃ sa kartum aiṣṭa mahīvṛṣā

prāpte Bhīmānakaṃ tasmin sasainye dainyam āśritaḥ /
Bhoṭṭadeśam agāt tūrṇam urvīparivṛḍho bhayāt

"nivartaya camūm anyāṃ kiṃ mithyā deśapīḍayā /
arājakās tvayā pālyāẖ Kaśmīrāẖ kulanāthavat"

iti śrīKoṭayāmātyaiḫ preritair lekhadhāribhiḥ /
āsārasainyam Acalaḫ pratyamuñcad vimohitaḥ

pratimuktanijāsāras sārahīno 'calas sa taiḥ /
mārgotsavacchalāt kañcit kālaṃ mārge vilambitaḥ

tāvac chrīKoṭayā devyā tadā pālayituṃ prajāḥ /
Bhauṭṭaẖ Kheriñcano nāma rājabhāve nyayujyata

pramītabhartṛkotpannamṛtāpatyeva sā tadā /
adūyata nijais sarvaiś cirasyācalaśemuṣī

Tuṣāraliṅgapūjābhiẖ kṛtārthīkṛtya vāsarān /
Bhoṭṭadeśān nijaṃ deśam agacchad vītabhīr nṛpaḥ