Rājataraṅginī · Verses 201-220

kṣīramātraikapāyitvaṃ nimittīkṛtya bhūpatiḥ /
yuṣmacchauryābhiśaṅkitvāt Timiṃ timim ivāvadhīt"

evaṃ sandeśanirbhinnāṣ Ṭakkādyāś śukkalaṅkitāḥ /
Viṃśaprasthe kadācit te prajahrur atha bhūbhujam

tatkhaḍgadhārāsampātair Vyālas teṣāṃ hṛdantarāt /
svaiśvaryatāpam anudad rājāmūrchat tu kevalam

te 'tha labdhajayammanyās tadvadhāpoḍhamanyavaḥ /
nagarāntar yayū rājyagrahaṇārtham ahaṅkṛtāḥ

kṣaṇaṃ mṛta iva sthitvā bhūyoghātabhayān nṛpaḥ /
dūraṃ gatān ripūn dṛṣṭvā rājye rājodatiṣṭhata

ārukṣan rājadhānīṃ te yāvat tāvan narādhipam /
apetamūrcham āyāntam adrākṣuẖ kṣudrabuddhayaḥ

"tvayā kiṃ na tvayā kiṃ na hato rāje"ty anītayaḥ /
parasparavivādāt te tatkālaṃ cukṣubhur jaḍāḥ

anyo'nyamanyavo 'nyo'nyaloṭhanād rājasadmanaḥ /
kartavyaṃ maraṇaṃ rājñā vyadhus svasya svayaṃ jaḍāḥ

śeṣān rājātha duśśīlāñ chūlāropeṇa kevalam /
uccaistām anayan mānī sarvathādhogatiṃ punaḥ

sagarbhā vairikoṭṭastrī roṣavān sa vyadīdarat /
asibhir bhūpatir garbhaśāliśimbīr nakhair iva

taddroharoṣajā pīḍā rājñas tatkulamāraṇāt /
citte śāntim agāt khaḍgaghātotthā na tu mūrdhani

dussvapnam iva tad dṛṣṭvā Ṭakkādicaritaṃ kṣaṇāt /
prabuddheva punaḫ prāpad abhayena śamaṃ mahī

adrohamadhyage rājā Śāhamere prasannadhīḥ /
saKoṭāmātṛkaṃ vṛddhyai svaputraṃ Haidaraṃ dadau

vardhitaẖ Koṭayā devyā prāvṛṣeva mahīruhaḥ /
sacchāyatvaṃ sphuratpattraś Śāhamero nyaṣevata

parikhācchalato 'kīrtyā svaparājayajātayā /
parito valitaṃ rājā svanāmāṅkaṃ puraṃ vyadhāt

pauṣadurdinamārtāṇḍasannibho dharaṇīpatiḥ /
māsāṃś ca katicid bhūyaḫ prakāśam akarod bhuvaḥ

hemante śaityapāruṣyadoṣeṇa dharaṇīpateḥ /
marutkopena naiviḍyaṃ śiraḫpīḍāgrahīttarām

sadānekottamāṅgānāṃ pīḍāharaguṇaśriyaḥ /
bhūpater uttamāṅgasya pīḍā kaṣṭam avardhata

ekādaśyāṃ tataḫ pauṣe navanandāṅkavatsare /
nirastā mṛtyuvaidyena bhūpater mṛtyuvedanā

ekādaśadinair nyūnau māsau trīn vatsarān api /
kṣamāṃ saṃrakṣya sa svargaṃ yayau Riñcanabhūpatiḥ