Rājataraṅginī · Verses 1-20

Jonarāja and Pseudo-Jonarāja: Rājataraṅginī
siddhe yatra sati trapākulam iva spardhābhilāṣāhater antardhiṃ vahati trilokamahitaṃ śeṣaṃ nijārdhadvayam /
snehaikībhavadāśayadvayajayākāṅkṣīva gāḍhaṃ miladdehārdhadvayam astu tad bhagavatos sadbhāvasampattaye

dātuṃ bhaktāya kalyāṇaṃ garbhaṃ bibhrad ivānvaham /
tundibho gaṇarājas sa vighnaśāntiṃ karotu naḥ

śrīGonandamukhair dharmasammukhair ā kaleẖ kila /
KaśmīraKāśyapī bhūpair apāli guṇaśālibhiḥ

teṣām abhāgyahemantaniśātamasi tiṣṭhati /
naiva kaścid apaśyat tān kāvyārkānudayāc ciram

rasamayyā girā vṛddhāṃ nityatāruṇyam āpipat /
atha śrīJayasiṃhāntāṃ tatkīrtiṃ Kalhaṇaẖ kaviḥ

tato deśādidoṣeṇa tadabhāgyair athāpi vā /
kavir vāksudhayā kaścin nājijīvat parān nṛpān

śrīJainollābhadīne kṣmāṃ sampraty akṣati rakṣati /
Jonarājābhidhas teṣāṃ udyato vṛttavarṇane

darpaglānibhavāṃ rājapānthānāṃ tāpasantatim /
hantuṃ saṃropitaẖ kāvyadrumo bhāviphalodayaḥ

upaskārarasaṃ kṣiptvā vinayāmṛtaśītalaiḥ /
sajjanair vardhanīyo 'yam api yatnena bhūyasā

magnān vismṛtipāthodhāv atītān nṛpatīn imān /
śrīJainollābhadīnasya kāruṇyād ujjihīrṣataḥ

sarvadharmādhikāreṣu niyuktasya dayāvataḥ /
mukhāc chrīŚiryabhaṭṭasya prāpyājñām anavajñayā

rājāvaliṃ pūrayituṃ samprati pratibhā mama /
kavināmābhilāṣeṇa na tu yasmān mamodyamaḥ

kva cuṇṭhījalavan madvāk kva ca kāvyataraṅgitam /
chāyāmātrānukāreṇa kiṃ naḍaṃ puṇḍrakāyate

antaśśūnyāṃ laghuṃ prajñāṃ tumbīm iva vahann aham /
pāraṃ Rājataraṅgiṇyā gantuṃ hantodyamaṃ gataḥ

pṛthvīnāthaguṇādhyāne cāpalaṃ me na dūṣaṇam /
alaṅkārair ahaṅkārāt kurūpāpi hi valgati

kavīnām upayogyā vā madvāk svāntaraśuddhaye /
Gaṅgājalaṃ jalaṃ teṣāṃ yair na pītaṃ jalāntaram

rājodantakathāsūtrapātamātraṃ kṛtaṃ mayā /
kurvantu racanām atra caturāẖ kaviśilpinaḥ

maṇīnāṃ gharṣaṇāyaiva mahāśāṇasya naipuṇam /
kāntipraṇayane teṣāṃ mukhasāramaṇes tu tat

vinaiva prārthanāṃ kāvyaṃ kaveḫ paśyanti sādhavaḥ /
kim arthitaś śaśī viśvaṃ sudhāsāreṇa siñcati

anunīto 'pi kāluṣyaṃ khalaẖ kāvye na muñcati /
sudhādhauto 'pi nāṅgāraś śubhratām eti jātucit