Rājataraṅginī · Verses 181-200

Ṭakkabhrātā Timir nāma mārge santāpakheditaḥ /
gopālyāẖ kutracid grāme kṣīraṃ niṣpītavān haṭhāt

rājñā vijñāpitenātha sadyo gopālayoṣitā /
anuyuktas Timir bhītyā vyadhāt sarvasya nihnavam

asatye bhāvitā gopī yadā dhairyān na sāskhalat /
pānāśayaṃ Timer eva sa satyaikṣī vyadārayat

tasya pānāśayād dīrṇān niryāntyā kṣīradhārayā /
rājñaẖ kīrtir mukhaśrīś ca gopyāḫ prāpat prasannatām

Vāravāle nivasator asuvātāṃ kayoścana /
aśve kiśorakau tulyau kasminn api vanāntare

siṃhasaṅkṣayitāpatyā tayor anyatamā vane /
aśvasādṛśyavātsalyād apuputrīyiṣat param

"madīyo 'yaṃ madīyo 'yam" ity asañjātaniścayau /
vaḍavādhipatī kṣobhād rājāntikam agacchatām

sa vivādaṃ tayoś śrutvā svāntikaṃ svīyamānuṣaiḥ /
vaḍave ca kiśoraṃ ca rājābhyānāyayat tataḥ

tasmin kiśorake bālyād dūraṃ dhāvati līlayā /
mātā dhātrī ca nitarām asnihyac cāpy aheṣayat

sabhyeṣv anelamūkeṣu vādinoẖ kṣobhasajjayoḥ /
aśve nāvānayan madhyeVitastaṃ sakiśorake

bālāśvaṃ pātitaṃ nadyāṃ nāvo rājñā mahādhiyā /
haṭhād anvapatan mātā parā param aheṣayat

sandigdhavyavahārāṇām evaṃ niścayakāriṇi /
tasmin rājñi jano 'maṃsta kṛtaṃ yugam ivāgatam

śrīDevasvāminaṃ śaivīṃ dīkṣāṃ yācan narādhipaḥ /
nānvagrāhi sa Bhauṭṭatvāt tenāpātratvaśaṅkayā

anujas tanujo bandhur mantrī sahacaras sakhā /
Vyālarājo nṛpasyābhūt satyaikavrataniṣṭhayā

jahau Vyālaẖ kṛtaṃ rājñā na sa Vyālakṛtaṃ punaḥ /
mano hi kāyikaṃ hanti tatkṛtaṃ na vapuḫ punaḥ

kalānidhau rasamaye Vyāle bhūlokabhāsvataḥ /
mūrchitā rucir acchaitsīd acchedyaṃ jagatāṃ tamaḥ

[Ps-JRT 11]
praveṣṭukāmaṃ Kaśmīrān nivartayitum añjasā /
Ḍulcyaṃ dhanaprayogeṇa yo visṛṣṭo mahībhujā // JRt_B.229 //
avamantrya praviṣṭe 'tha Ḍulucye bhayato gataḥ /
Gāndhāradeśaṃ Udyānadevo labdhāntaras tataḥ // JRt_B.230 //
śrīmān Udyānadevo 'tha randhrapraharaṇodyataḥ /
samādikṣata Ṭakkādīn Gāndhārastho bhayād iti

"jīvatām eva gantavyaṃ jāne tan nagarāntaram /
yat sevyate 'viśeṣajñas svāmī sammānalipsayā

bhuṅkte Vyālaś śriyaṃ prāṇapaṇair yuṣmābhir arjitām /
karau sādhayato yatnād rasanā bhogabhāginī

īśvaro bhūtiliptāṅgo Vyālaṃ hārīcikīrṣati /
anāsthāṃ tu suvarṇeṣu yuṣmāsu vidadhāti saḥ