Rājataraṅginī · Verses 141-160

sakuṭumbaṃ tam āyāntaṃ vṛttidānena bhūpatiḥ /
anujagrāha sotkarṣaṃ cūtadruma ivālinam

Ḍalacākhyaẖ Karmasenacakravarticamūpatiḥ /
Kaśmīrān sa tadaivāgāt siṃho mṛgaguhām iva

ṣaṣṭigrāmasahasreṣu svāmyaṃ dātum ivātra saḥ /
tāvatsaṅkhyasahasrāṇi svasainye sādino 'vahat

Ḍalcaṃ dhanaprayogena nivivartayiṣur nṛpaḥ /
sarveṣām eva varṇānāṃ durvarṇo daṇḍam akṣipat

prāṇāhutyā prabhoẖ kope tatpratigrahasāṃhasaḥ /
prāyasthā brāhmaṇāḫ prāyaścittīyāṃ cakrur akramam

[Ps-JRT 7]
daṇḍaduẖkhena viprair yaś śāpo datto mahībhujaḥ /
bhaviṣyan vaṃśavicchedo dhruvaṃ tasyaiva tat phalam // JRt_B.156 //
tadaiva Kālamānyākhyair Bhauṭṭair ghaṭṭitavairibhiḥ /
sabandhur gotrajo vyājād Bakatanyo nyahanyata

[Ps-JRT 8]
svadeśe Vakatanyākhyo gotrajasyātmajo hataḥ // JRt_B.157cd //
mānyo 'sāmānyadhīẖ Kālamānyavaṃśadavānalaḥ /
avāśiṣyata tatputro daivād ekas sa Riñcanaḥ

VyālaṬakkamukhair mantrasūtrasaṃyojitair atha /
baddhvā saṃhatikanthāṃ sa tāñ jaḍāñ jetum iṣṭavān

"nipāsyamānakośaṃ māṃ bhṛtyatve vṛṇute"ti saḥ /
tān pratyaśrāvayad dūtamukhena svātatāyinaḥ

nṛsiṃhas sa nadītīre sikatāsthagitāyudhaḥ /
tān pratyaikṣata raktasya na tu kośasya pītaye

Vyālādyair āgatās tatra Kālamānyā nirāyudhāḥ /
sikatāntarniviṣṭasya paraśvagnes tṛṇīkṛtāḥ

prakṣālya vairiraktena pitṛdroharajomalam /
śeṣānekāribhītyāgāt Kaśmīrān bandhubhis saha

pūrṇasya Rāmacandrasya rucihānyai dharāryamā /
Nīlāśābhre RiñcaRāhor udayaṃ so 'tha soḍhavān

hetibhis tāpayaty āśā Ḍalace kṛṣṇavartmani /
Kāśmīrikair janais sarvaiś śalabhatvam alabhyata

ruddhayor ḌalcaRiñcābhyāṃ prācyudīcyor bahur janaḥ /
vasateḫ paścimām āśāṃ prāg Yamāśām athāgamat

adho Ḍalcāmbupūrād bhīr girau Riñcanamārutāt /
chāyājuṣāṃ phalāḍhyānāṃ puṃnāgānām abhūt tadā

pakṣiśāvam iva sthānacyutaṃ cillollasadrayā /
balaśrī Raiñcanī lokaṃ Kāśmīrikam apāharat

dhanāmbu prāpya Bhauṭṭebhyaẖ Kāśmīrajanavikrayāt /
garjann āśāḫ pyadhāt sarvās tadā Riñcanavāridaḥ

[Ps-JRT 9]
TuruṣkaTājikaMlecchasainyacchāditabhūtalaḥ /
Ḍulucyo nagaraṃ prāpad athāgastya ivārṇavam // JRt_B.170 //
mṛgās siṃham ivodagraṃ garutmantam ivāṇḍajāḥ /
tam āpatantam ālokya palāyanta puraukasaḥ // JRt_B.171 //
baddhāḫ palāyinas tena māntrikeṇeva pannagāḥ /
kecit palāyitā bhītyā praviṣṭā girigahvaram // JRt_B.172 //
rājāpi kvāpi sañchanno bhītyā ghūkavad āsta saḥ /
itareṣāṃ tu lokānāṃ kā kathā tatra vāsinām // JRt_B.173 //
vipraśāpo narendrāṇāṃ vṛthā jāto na jātucit /
salakṣmā rājayakṣmā hi nāhatvā vinivartate // JRt_B.174 //
gūḍhārthaṃ dāpitāḫ pūrvaṃ gāḍhayā bandhapīḍayā /
vikrītā vājibhiḫ paścāt Turuṣkair hastagā janāḥ // JRt_B.175 //
viddhāẖ kecit pare baddhā virāddhās tena kecana /
ploṣaṃ kecit pare śoṣaṃ doṣaṃ yānty analād drumāḥ // JRt_B.176 //
jatruvedhena baddhānām ekayā carmavadhrayā /
teṣāṃ durāpam apy āsīd anyo'nyamukhadarśanam // JRt_B.177 //
ghāsendhanādisambhāraḍhaukanāya kṣaṇaṃ kṣaṇam /
baddhā Mlecchair amucyanta biḍālair iva mūṣakāḥ // JRt_B.178 //
yeṣām anne jugupsābhūd biḍālasparśadoṣataḥ /
Mlecchocchiṣṭaṃ gavāṃś cāsthi tair baddhair bhakṣitaṃ kṣudhā // JRt_B.179 //
vaitastam api ye vāri na papuḫ paṅkasaṅkulam /
baddhair maruṣu tair nītair mūtraṃ pītaṃ bhṛśaṃ tṛṣā // JRt_B.180 //
"kva Mlecchānnaṃ kva vaṃśo no dussahā kṣuc chrutena kim /
nidrā nādyāpi mārgeṇa" te 'ntar evam acintayan // JRt_B.181 //
gacchatāṃ tiṣṭhatāṃ teṣām aśnatāṃ jalpatām api /
so 'bhūn naiva kṣaṇo yatra na te kāryam asādhayan // JRt_B.182 //
Mlecchaiẖ kecit Khaśaiẖ kecid Daradbhir apare tathā /
Bhoṭṭaiẖ kecit Turuṣkaiś ca kecid bandīkṛtā janāḥ // JRt_B.183 //
annaṃ gṛhe vane vittaṃ mārge bandhūn vihāya ca /
palāyām āsur apare Turuṣkabhayasambhramāt // JRt_B.184 //
karuṇāgauravaghṛṇā drutaṃ gantum aśaktiṣu /
bālavṛddhābalāsv ete tyaktavantaḫ palāyinaḥ // JRt_B.185 //
na bhuktaṃ kṣudhitair mārge na pītaṃ tṛṣitair api /
kim anyad bhayasaṃbhrāntaiḫ paścāt tair nāpi vīkṣitam // JRt_B.186 //
kṣudhā kecit tṛṣā kecid bhiyā kecit pare hriyā /
bhayād biladarīṣv eva praviśyāntar vipedire // JRt_B.187 //
bilapraviṣṭāṃs tāñ chrutvā tato niṣkāsanecchavaḥ /
niṣkāruṇyās Turuṣkās te dhūmaṃ bilamukhe daduḥ // JRt_B.188 //
dhūmenāntar vipannānāṃ narāṇām asthirāśayaḥ /
dṛśyante 'dyāpi dhūmotthaṃ mālinyaṃ ca guhāmukhe // JRt_B.189 //
rājāpacāram akarot prajāsu phalitas tu saḥ /
nārīṇāṃ capalā dṛṣṭir dantair gaṇḍas tu khaṇḍyate // JRt_B.190 //
nāśitāśeṣadeśo 'tha sphītaśītabhayākulaḥ /
Ḍalcaẖ Kaśmīratas Tārabalamārgeṇa niryayau

janāẖ Kāśmirikā durgabilebhyo mūṣakā iva /
Ḍalacotau gate bandīkṛtaśeṣā viniryayuḥ