Rājataraṅginī · Verses 121-140

kartā kāryaṃ ca lagnaṃ ca gurus siṃhaś ca kovidaḥ /
patiteyaṃ bhavet tasya vrate siṃhaparamparā

sa niṣkalakṣavikrītakṣīreṇa Vijayeśvaram /
ekāha eva snapayan vrataśuddhiṃ yayau nṛpaḥ

rājñā śrīŚaṅkarasvāmī gurur mantropadeśakṛt /
yo 'ṣṭādaśamaṭhaiśvaryadakṣiṇābhir apūjyata

paralokajayopāyaṃ Vāgdevīprābhṛtaṃ nṛpaḥ /
ātmopajñam imaṃ ślokaṃ śayyotthāyaṃ sadāpaṭhat

"pāvakanirmaladṛṣṭiṃ vibudhagaṇair arcyamānapādam aham /
śaśiśakalādarśayutaṃ Gaurīśaṃ Śaṅkaraṃ vande"

[Ps-JRT 5]
pānthānāṃ toyadānāya pitṝṇāṃ tarpaṇāya ca /
dampatyoḫ pāpanāśāya dharmasaṃvardhanāya ca // JRt_B.131 //
nijālaṅkāradānena nipānaṃ racitaṃ pathi /
Maḍavāśramagrāmānte Gauryā Śaṅkarabhāryayā // JRt_B.132 //
Khonamoṣādhipasyāsīt kanyā Prajjadvijasya sā /
satyaśīlānvitā bhaktā Gaurī Gaurīva Śaṅkare // JRt_B.133 //
duhitur duścaritreṇa yo 'bhūd daṇḍaḫ pituḫ patan /
Iḍāgalyārthito rājā nartakyā taṃ nyavārayat

sa durjanapariṣvaṅgād āstikaprajñayojjhitaḥ /
dhātrīputryāṃ smarādarśe svātmānaṃ pratyabimbayat

Daryākhyo bhaginīsvāmī Kāmasūhopabṛṃhitaḥ /
taṃ viraktaprajaṃ muktavinayaṃ chadmanāvadhīt

caturdaśābdān ṣaṇmāsāṃs tryahanyūnān mahīpatiḥ /
bhūtvā śucau divam agāt sa varṣe saptasaptate

12) Sūhadeva (LS 4377-4396)
tadbhrātā Sūhadevo 'tha Kāmasūhopabṛṃhitaḥ /
jaḍo 'pi sakalām eva Kaśmīrakṣmāṃ vaśe vyadhāt

digantarād upāgatya bahavo vṛttilipsayā /
tam āśrayan mahīpālaṃ puṣpadrumam ivālayaḥ

[Ps-JRT 6]
vṛttyai Laṅkāracakko 'pi Daraddeśāt tadāyayau /
santater bhāvisāmrājyaḫ prājyaṃ Kaśmīramaṇḍalam // JRt_B.140 //
Kramarājyābhidhe rāṣṭre Trāhagrāmaṃ nṛgrāmaṇīḥ /
dadau vasataye tasmai niyates sa niyogataḥ // JRt_B.141 //
Pārtho 'nya iva Pārtho 'bhūt Pañcagahvarasīmani /
yo Garbharapuraṃ cakre tatputro Babhruvāhanaḥ

tadvaṃśyaẖ Kuruśāho 'bhūd yadbāhūdayaparvate /
jyākiṇacchadmanā bheje yaśaś śubhratviṣaṃ niśā

"Kaśmīrāḫ Pārvatī tatra rājā jñeyo Harāṃśajaḥ" /
ity etatpratyayāyeva yasyāsīc cakṣuṣāṃ trayam

Kaśmīreṣu hi sāmrājyaṃ Kuruśāhasya santatiḥ /
Śaṃśadīnamukhī mukhyā khyātakīrtiẖ kariṣyati

Tāharājo 'janiṣṭāsmād yasya cāpalatāśritā /
muhurmuhur aho maurvī śrutyantam agamattarām

Śāhameras svavīryoṣmagrīṣmo bhānus tato 'jani /
yasya vairivadhūvāṣpaiḫ pratāpāgnir adīpyata

vane viharatas tasya Śāhmerasya kadācana /
mṛgayā prathamaṃ dṛṣṭiṃ paścān nidrā vyalobhayat

"rājyam ā santater bhāvi Kaśmīreṣu tave"ti saḥ /
svapne vāksudhayā tatra Mahādevyābhyaṣicyata

pañcāgnyarkamite śāke navāṣṭāṅkitavatsare /
tatas saparivāras sa Kaśmīrān aviśac chanaiḥ