Rādhākṛṣṇāṣṭakālīyalīlāsmaraṇakramapaddhati · Verses 81-100

viṣaṇḍa-vadano bhūtvā gata-sva iva nārada /
jito 'smi ca tvayā devi gṛhyatāṃ yat paṇī-kṛtam

cumbanādi mayā dattam ity uktvā ca tathācarat /
kauṭilyaṃ tad-bhruvor draṣṭuṃ śrotuṃ tad-bhartsanaṃ vacaḥ

tataḥ śārī-śukānāṃ ca śrutvā vāgāhavaṃ mithaḥ /
nirgacchatas tataḥ sthānād gantukāmo gṛhaṃ prati

kṛṣṇaḥ kāntām anujñāpya gavām abhimukhaṃ vrajet /
sā tu sūrya-gṛhaṃ gacchet sakhī-maṇḍala-saṃyutā

kiyad-dūraṃ tato gatvā parāvṛtya hariḥ punaḥ /
vipra-veśaṃ samāsthāya yāti sūrya-gṛhaṃ prati

sūryaṃ ca pūjayet tatra prārthitas tat-sakhī-janaiḥ /
tad eva kalpitair vedaiḥ parihāsyāvagarbhitaiḥ

tatas tā api taṃ kāntaṃ parijñāya vicakṣaṇāḥ /
ānanda-sāgare līnā na viduḥ svaṃ na cāparam

vihārair vividhair evaṃ sārdha-yāma-dvayaṃ mune /
nītvā gṛhaṃ vajeṣus tāḥ sa ca kṛṣṇo gavāṃ vrajet

iti madhyāhna-sevā
athāparāhna-sevā--
saṅgamya tu sakhīn kṛṣṇo gṛhītvā gāḥ samantataḥ /
āgacchati vrajaṃ karṣann uttāna-muralī-ravaiḥ

tato nandādayaḥ sarve śrutvā veṇu-ravaṃ hareḥ /
go-dhūli-paṭalair vyāptaṃ dṛṣṭvā cāpi nabhaḥ-sthalam

visṛjya sarva-karmāṇi striyo bālādayo 'pi ca /
kṛṣṇasyābhimukhaṃ yānti tad-darśana-samutsukāḥ

rādhikāpi samāgatya gṛhaṃ snātvā vibhūṣitā /
sampācya kānta-bhogārthaṃ dravyāṇi vividhāni ca /
sakhī-saṃgha-yutā yānti kāntaṃ draṣṭuṃ samutsukāḥ

rāja-mārge vraja-dvāri yatra sarve vrajaukasaḥ /
kṛṣṇo 'py etān samāgamya yathāvad anupūrvaśaḥ

darśanaiḥ sparśanair vāpi smita-purvāvalokanaiḥ /
gopa-vṛddhān namaskāraiḥ kāyikair vācikair api

sāṣṭāṅga-pātaiḥ pitarau rohiṇīm api nārada /
netrānta-sūcitenaiva vinayena priyās tathā

evaṃ taiś ca yathā-yogyaṃ vrajaukobhiḥ prapūjitaḥ /
gavālayaṃ tathā gāś ca sampraveśya samantataḥ

pitṛbhyām arthito yāti bhrātrā saha nijālayam /
snātvā pitvā tathā kiñcid bhuktvā mātrānumoditaḥ /
gavālayaṃ punar yāti dogdhu-kāmo gavāṃ payaḥ

ity aparāhna-sevā
atha sāyaṃ-sevā--
tāś ca dugdhvā dohayitvā pāyayitvā ca kāścana /
pitrā sārdhaṃ gṛhaṃ yāti payo-bhāri-śatānugaḥ

tatrāpi mātṛ-vṛndaiś ca tat-putraiś ca balena ca /
saṃbhuṅkte vividhānnāni carvya-cūṣyādikāni ca

iti sāyaṃ-sevā
atha pradoṣa-sevā--
tan-mātuḥ prārthanāt pūrvaṃ rādhayāpi tadaiva hi /
prasthāpyante sakhī-dvārā pakvānnāni tad-ālayam