Rādhākṛṣṇāṣṭakālīyalīlāsmaraṇakramapaddhati · Verses 61-80

pṛthag ekena vapuṣā kṛṣṇo 'pi yugapad vibhuḥ /
sarvāsāṃ sannidhiṃ gacchet priyāṇāṃ parito muhuḥ

ramayitvā ca tāḥ sarvāḥ kariṇī-gajarāḍ iva /
priyayā ca tathā tābhiḥ sarovaram athāvrajet

śrī-nārada uvāca--
vṛnde śrī-nanda-putrasya mādhurya-krīḍane katham /
aiśvaryasya prakāśo 'bhūd iti me chindhi saṃśayam

śrī-vṛndovāca--
mune mādhurya-mayy asti līlā-śaktir harer dṛśā /
tayā pṛthak-kṛtaḥ krīḍed gopikābhiḥ samaṃ hariḥ

rādhayā saha rūpeṇa nijena ramate svayam /
iti mādhurya-līlāyāḥ śaktir neśatāyā hareḥ

jala-sekair mithas tatra krīḍitvā sa-gaṇau tataḥ /
vāsaḥ-srak-candanair divya-bhūṣaṇair api bhūṣitau

tatraiva sarasas tīre divya-ratna-maye gṛhe /
aśnītaḥ phala-mūlāni kalpitāni mayaiva hi

haris tu prathamaṃ bhuktvā kāntayā pariveśitam /
dvi-trābhiḥ sevito gacchec chayyāṃ puṣpa-vinirmitām

tāmbūlair vyajanais tatra pāda-saṃvāhanādibhiḥ /
sevyamāno bhṛśantābhir moditaḥ preyasīṃ smaran

śrī-rādhāpi harau supte sa-gaṇā muditāntarā /
kānta-dattaṃ prīta-manā ucchiṣṭaṃ bubhuje tataḥ

kiñcid evo tato bhuktvā vrajec chayyā-niketanam /
draṣṭuṃ kānta-mukhāmbhojaṃ cakorīvan niśā-karam

tāmbūla-carvitaṃ tasya tatratyābhir niveditam /
tāmbūlāny api cāśnāti vibhajanti priyāliṣu

kṛṣṇo 'pi tāsāṃ śuśrūṣuḥ svacchandaṃ bhāṣitaṃ mithaḥ /
prāpta-nidra ivābhāti vinidro 'pi paṭāvṛtaḥ

tāś ca kṣvelīṃ kṣaṇaṃ kṛtvā mithaḥ kānta-kathāśrayāḥ /
vyāja-nidrāṃ harer jñātvā kutaścid anumānataḥ

vimṛśya vadanaṃ dṛgbhiḥ paśyantyo 'nyonya-mānanam /
līnā iva lajjayā syuḥ kṣaṇam ucur na kiñcanam

kṣaṇād eva tato vastraṃ dūrī-kṛtya tad aṅgataḥ /
sādhu nidrāṃ gato 'sīti hāsayantyo hasanti tam

evaṃ tau vividhair hāsai ramamāṇau gaṇaiḥ saha /
anubhūya kṣaṇaṃ nidrā-sukhaṃ ca muni-sattama

upaviśyāsane divye sa-gaṇau vistṛte mudā /
paṇī-kṛtya mitho hāra-cumbāśleṣa-paricchadān

akṣair vikrīḍitaḥ premṇā narmālāpa-puraḥsaram /
parājito 'pi priyayā jitam ity avadan mṛṣā

hārādi-grahaṇe tasyāḥ pravṛttas tāḍyate tayā /
tayaivaṃ tāḍitaḥ kṛṣṇaḥ karṇotpala-saroruhaiḥ