રાધાકૃષ્ણાષ્ટકાલીયલીલાસ્મરણક્રમપદ્ધતિ · શ્લોક 81-100

વિષણ્ડ-વદનો ભૂત્વા ગત-સ્વ ઇવ નારદ ।
જિતો ઽસ્મિ ચ ત્વયા દેવિ ગૃહ્યતાં યત્ પણી-કૃતમ્

ચુમ્બનાદિ મયા દત્તમ્ ઇત્ય્ ઉક્ત્વા ચ તથાચરત્ ।
કૌટિલ્યં તદ્-ભ્રુવોર્ દ્રષ્ટું શ્રોતું તદ્-ભર્ત્સનં વચઃ

તતઃ શારી-શુકાનાં ચ શ્રુત્વા વાગાહવં મિથઃ ।
નિર્ગચ્છતસ્ તતઃ સ્થાનાદ્ ગન્તુકામો ગૃહં પ્રતિ

કૃષ્ણઃ કાન્તામ્ અનુજ્ઞાપ્ય ગવામ્ અભિમુખં વ્રજેત્ ।
સા તુ સૂર્ય-ગૃહં ગચ્છેત્ સખી-મણ્ડલ-સંયુતા

કિયદ્-દૂરં તતો ગત્વા પરાવૃત્ય હરિઃ પુનઃ ।
વિપ્ર-વેશં સમાસ્થાય યાતિ સૂર્ય-ગૃહં પ્રતિ

સૂર્યં ચ પૂજયેત્ તત્ર પ્રાર્થિતસ્ તત્-સખી-જનૈઃ ।
તદ્ એવ કલ્પિતૈર્ વેદૈઃ પરિહાસ્યાવગર્ભિતૈઃ

તતસ્ તા અપિ તં કાન્તં પરિજ્ઞાય વિચક્ષણાઃ ।
આનન્દ-સાગરે લીના ન વિદુઃ સ્વં ન ચાપરમ્

વિહારૈર્ વિવિધૈર્ એવં સાર્ધ-યામ-દ્વયં મુને ।
નીત્વા ગૃહં વજેષુસ્ તાઃ સ ચ કૃષ્ણો ગવાં વ્રજેત્

ઇતિ મધ્યાહ્ન-સેવા
અથાપરાહ્ન-સેવા--
સઙ્ગમ્ય તુ સખીન્ કૃષ્ણો ગૃહીત્વા ગાઃ સમન્તતઃ ।
આગચ્છતિ વ્રજં કર્ષન્ન્ ઉત્તાન-મુરલી-રવૈઃ

તતો નન્દાદયઃ સર્વે શ્રુત્વા વેણુ-રવં હરેઃ ।
ગો-ધૂલિ-પટલૈર્ વ્યાપ્તં દૃષ્ટ્વા ચાપિ નભઃ-સ્થલમ્

વિસૃજ્ય સર્વ-કર્માણિ સ્ત્રિયો બાલાદયો ઽપિ ચ ।
કૃષ્ણસ્યાભિમુખં યાન્તિ તદ્-દર્શન-સમુત્સુકાઃ

રાધિકાપિ સમાગત્ય ગૃહં સ્નાત્વા વિભૂષિતા ।
સમ્પાચ્ય કાન્ત-ભોગાર્થં દ્રવ્યાણિ વિવિધાનિ ચ ।
સખી-સંઘ-યુતા યાન્તિ કાન્તં દ્રષ્ટું સમુત્સુકાઃ

રાજ-માર્ગે વ્રજ-દ્વારિ યત્ર સર્વે વ્રજૌકસઃ ।
કૃષ્ણો ઽપ્ય્ એતાન્ સમાગમ્ય યથાવદ્ અનુપૂર્વશઃ

દર્શનૈઃ સ્પર્શનૈર્ વાપિ સ્મિત-પુર્વાવલોકનૈઃ ।
ગોપ-વૃદ્ધાન્ નમસ્કારૈઃ કાયિકૈર્ વાચિકૈર્ અપિ

સાષ્ટાઙ્ગ-પાતૈઃ પિતરૌ રોહિણીમ્ અપિ નારદ ।
નેત્રાન્ત-સૂચિતેનૈવ વિનયેન પ્રિયાસ્ તથા

એવં તૈશ્ ચ યથા-યોગ્યં વ્રજૌકોભિઃ પ્રપૂજિતઃ ।
ગવાલયં તથા ગાશ્ ચ સમ્પ્રવેશ્ય સમન્તતઃ

પિતૃભ્યામ્ અર્થિતો યાતિ ભ્રાત્રા સહ નિજાલયમ્ ।
સ્નાત્વા પિત્વા તથા કિઞ્ચિદ્ ભુક્ત્વા માત્રાનુમોદિતઃ ।
ગવાલયં પુનર્ યાતિ દોગ્ધુ-કામો ગવાં પયઃ

ઇત્ય્ અપરાહ્ન-સેવા
અથ સાયં-સેવા--
તાશ્ ચ દુગ્ધ્વા દોહયિત્વા પાયયિત્વા ચ કાશ્ચન ।
પિત્રા સાર્ધં ગૃહં યાતિ પયો-ભારિ-શતાનુગઃ

તત્રાપિ માતૃ-વૃન્દૈશ્ ચ તત્-પુત્રૈશ્ ચ બલેન ચ ।
સંભુઙ્ક્તે વિવિધાન્નાનિ ચર્વ્ય-ચૂષ્યાદિકાનિ ચ

ઇતિ સાયં-સેવા
અથ પ્રદોષ-સેવા--
તન્-માતુઃ પ્રાર્થનાત્ પૂર્વં રાધયાપિ તદૈવ હિ ।
પ્રસ્થાપ્યન્તે સખી-દ્વારા પક્વાન્નાનિ તદ્-આલયમ્