રાધાકૃષ્ણાષ્ટકાલીયલીલાસ્મરણક્રમપદ્ધતિ · શ્લોક 61-80

પૃથગ્ એકેન વપુષા કૃષ્ણો ઽપિ યુગપદ્ વિભુઃ ।
સર્વાસાં સન્નિધિં ગચ્છેત્ પ્રિયાણાં પરિતો મુહુઃ

રમયિત્વા ચ તાઃ સર્વાઃ કરિણી-ગજરાડ્ ઇવ ।
પ્રિયયા ચ તથા તાભિઃ સરોવરમ્ અથાવ્રજેત્

શ્રી-નારદ ઉવાચ--
વૃન્દે શ્રી-નન્દ-પુત્રસ્ય માધુર્ય-ક્રીડને કથમ્ ।
ઐશ્વર્યસ્ય પ્રકાશો ઽભૂદ્ ઇતિ મે છિન્ધિ સંશયમ્

શ્રી-વૃન્દોવાચ--
મુને માધુર્ય-મય્ય્ અસ્તિ લીલા-શક્તિર્ હરેર્ દૃશા ।
તયા પૃથક્-કૃતઃ ક્રીડેદ્ ગોપિકાભિઃ સમં હરિઃ

રાધયા સહ રૂપેણ નિજેન રમતે સ્વયમ્ ।
ઇતિ માધુર્ય-લીલાયાઃ શક્તિર્ નેશતાયા હરેઃ

જલ-સેકૈર્ મિથસ્ તત્ર ક્રીડિત્વા સ-ગણૌ તતઃ ।
વાસઃ-સ્રક્-ચન્દનૈર્ દિવ્ય-ભૂષણૈર્ અપિ ભૂષિતૌ

તત્રૈવ સરસસ્ તીરે દિવ્ય-રત્ન-મયે ગૃહે ।
અશ્નીતઃ ફલ-મૂલાનિ કલ્પિતાનિ મયૈવ હિ

હરિસ્ તુ પ્રથમં ભુક્ત્વા કાન્તયા પરિવેશિતમ્ ।
દ્વિ-ત્રાભિઃ સેવિતો ગચ્છેચ્ છય્યાં પુષ્પ-વિનિર્મિતામ્

તામ્બૂલૈર્ વ્યજનૈસ્ તત્ર પાદ-સંવાહનાદિભિઃ ।
સેવ્યમાનો ભૃશન્તાભિર્ મોદિતઃ પ્રેયસીં સ્મરન્

શ્રી-રાધાપિ હરૌ સુપ્તે સ-ગણા મુદિતાન્તરા ।
કાન્ત-દત્તં પ્રીત-મના ઉચ્છિષ્ટં બુભુજે તતઃ

કિઞ્ચિદ્ એવો તતો ભુક્ત્વા વ્રજેચ્ છય્યા-નિકેતનમ્ ।
દ્રષ્ટું કાન્ત-મુખામ્ભોજં ચકોરીવન્ નિશા-કરમ્

તામ્બૂલ-ચર્વિતં તસ્ય તત્રત્યાભિર્ નિવેદિતમ્ ।
તામ્બૂલાન્ય્ અપિ ચાશ્નાતિ વિભજન્તિ પ્રિયાલિષુ

કૃષ્ણો ઽપિ તાસાં શુશ્રૂષુઃ સ્વચ્છન્દં ભાષિતં મિથઃ ।
પ્રાપ્ત-નિદ્ર ઇવાભાતિ વિનિદ્રો ઽપિ પટાવૃતઃ

તાશ્ ચ ક્ષ્વેલીં ક્ષણં કૃત્વા મિથઃ કાન્ત-કથાશ્રયાઃ ।
વ્યાજ-નિદ્રાં હરેર્ જ્ઞાત્વા કુતશ્ચિદ્ અનુમાનતઃ

વિમૃશ્ય વદનં દૃગ્ભિઃ પશ્યન્ત્યો ઽન્યોન્ય-માનનમ્ ।
લીના ઇવ લજ્જયા સ્યુઃ ક્ષણમ્ ઉચુર્ ન કિઞ્ચનમ્

ક્ષણાદ્ એવ તતો વસ્ત્રં દૂરી-કૃત્ય તદ્ અઙ્ગતઃ ।
સાધુ નિદ્રાં ગતો ઽસીતિ હાસયન્ત્યો હસન્તિ તમ્

એવં તૌ વિવિધૈર્ હાસૈ રમમાણૌ ગણૈઃ સહ ।
અનુભૂય ક્ષણં નિદ્રા-સુખં ચ મુનિ-સત્તમ

ઉપવિશ્યાસને દિવ્યે સ-ગણૌ વિસ્તૃતે મુદા ।
પણી-કૃત્ય મિથો હાર-ચુમ્બાશ્લેષ-પરિચ્છદાન્

અક્ષૈર્ વિક્રીડિતઃ પ્રેમ્ણા નર્માલાપ-પુરઃસરમ્ ।
પરાજિતો ઽપિ પ્રિયયા જિતમ્ ઇત્ય્ અવદન્ મૃષા

હારાદિ-ગ્રહણે તસ્યાઃ પ્રવૃત્તસ્ તાડ્યતે તયા ।
તયૈવં તાડિતઃ કૃષ્ણઃ કર્ણોત્પલ-સરોરુહૈઃ