Rādhākṛṣṇāṣṭakālīyalīlāsmaraṇakramapaddhati · Verses 41-60

kaṅkaṇāṅgada-keyūra-ratna-mudrālasat-karaḥ /
muktāhāra-sphurad-vakṣā makarākṛti-kuṇḍalaḥ

muhur ākārito mātrā praviśed bhojanālaye /
avalambya karaṃ mātur baladevam anuvrataḥ

bhuktvā ca vividhānnāni mātrā ca sakhibhir vṛtaḥ /
hāsayan vividhair vākyaiḥ sakhīṃs tair hāsitaḥ svayam

itthaṃ bhuktvā tathācamya divya-khaṭṭopari kṣaṇāt /
viśramet sevakair dattaṃ tāmbūlaṃ vibhajann adan

rādhāpi bhojanānandaṃ dṛṣṭvā yaśodayāhūta /
lalitādi-sakhī-vṛtā bhuṅkte 'nnaṃ lajjayānvitā

iti prātaḥ-sevā
atha pūrvāhna-sevā--
gopa-veśa-dharaḥ kṛṣṇo dhenu-vṛnda-puraḥ-saraḥ /
vraja-vāsi-janaiḥ prītyā sarvair anugataḥ pathi

pitaraṃ mātaraṃ natvā netrāntena priyā-gaṇān /
yathāyogyaṃ tathā cānyān sannivartya vanaṃ vrajet

vanaṃ praviśya sakhibhiḥ krīḍitvā ca kṣaṇaṃ tataḥ /
vañcayitvā ca tān sarvān dvi-traiḥ priya-sakhair yutaḥ

saṅketakaṃ vrajed dharṣāt priyā-sandarśanotsukaḥ /
sāpi kṛṣṇe vanaṃ yāte dṛṣṭvā taṃ gṛham āgatā

sūryādi-pūjā-vyājena kusumādy-āhṛti-cchalāt /
vañcayitvā gurūn yāti priya-saṅgecchayā vanaṃ

iti pūrvāhna-sevā
atha madhyāhna-sevā--
itthaṃ tau bahu-yatnena militvā sva-gaṇair vṛtau /
vihārair vividhais tatra vane vikrīḍato mudā

syandolikā-samārūḍhau sakhībhir dolitau kvacit /
kvacid veṇuṃ kara-srastaṃ priyayā coritaṃ hariḥ

anveṣayann upālabdho vipralabdhaḥ priyā-gaṇaiḥ /
hāsito bahudhā tābhir hṛta-sva iva tiṣṭhati

vasanta-ṛtunā juṣṭaṃ vana-khaṇḍaṃ kvacin mudā /
praviśya candanāmbhobhiḥ kuṅkumādi-jalair api

viṣiñcato yantra-muktais tat-paṅkenāpi tau mithaḥ /
sakhyo 'py evaṃ viṣiñcanti tāś ca tau siñcataḥ punaḥ

tathānyartusu juṣṭāsu krīḍato vana-rājiṣu /
tat-tat-kālocitair nānā-vihāraiḥ sa-gaṇau dvija

śrāntau kvacid vṛkṣa-mūlam āsādya muni-sattama /
upaviśyāsane divye madhu-pānaṃ pracakratuḥ

tato madhu-madonmattau nidrayā mīlitekṣaṇau /
mithaḥ pāṇiṃ samālambya kāma-bāṇa-vaśaṅgatau

riraṃsu viśataḥ kuñjaṃ skhalat-pādābjakau pathi /
tato vikrīḍatas tatra kariṇī-yūthapau yathā

sakhyo 'pi madhubhir mattā nidrayā pihitekṣaṇāḥ /
abhitaḥ kuñja-puñjeṣu sārvā eva vililyire