Rādhākṛṣṇāṣṭakālīyalīlāsmaraṇakramapaddhati · Verses 141-160

ataeva pādmottara-khaṇḍoktaṃ dvārakādhipater vṛndāvanaṃ prati-gamanaṃ kṣīrābdhiśāyy āviṣṭatvāt kṣīrābdhiśāyino droṇādīnāṃ labdha-vara-tvāt, teṣāṃ punaḥ sva-sthāna-prāpaṇārtham evety avagantavyam /
śrīmad-bhāgavata-vākyānām evaṃ vicāro 'vagantavyaḥ padmottara-khaṇḍe tu ôkālindi-puline ramyeö ity atra śrī-dvārakā-nāthasya śrī-nanda-nandana-madhura-līlā-saṃdarśane sotkaṇṭhatvād vyoma-yānair etya śrī-vṛndāvane māsa-dvayam uvāsety abhiprāyo jñeyaḥ /
tad yathā śrī-lalita-mādhave (8.34)--ôaparikalita-pūrvaḥö ityādi /
iti te sarvam ākhyātaṃ naityikaṃ caritaṃ hareḥ /
pāpino 'pi vimucyante smaraṇād yasya nārada

aṣṭa-kālokta-śuśrūṣā-nantaraṃ sādhakaḥ kramāt /
dvātriṃśad-akṣara-mukhyān japen mantrān atandritaḥ

mahā-mantraṃ japed ādau daśārṇaṃ tad-anantaram /
tataḥ śrī-rādhikā-mantraṃ gāyatrīṃ kāmakīṃ tathā

tato yugala-mantraṃ ca japed rāsa-sthalī-pradam /
tato 'ṣṭānāṃ sakhīnāṃ ca japen mantrān yathā-kramam /
tataḥ ṣaṇ-mañjarīṇāṃ ca sva-sva-mantrān kramāj japet

yathā ādi-purāṇe--
gopī-bhāvena ye bhaktā mām eva paryupāsate /
teṣu tāsv iva tuṣṭo 'smi satyaṃ satyaṃ dhanañjaya

veśa-bhūṣā-vayo-rūpair gopikā-bhāvam āśritāḥ /
bhāvukīyāś ca tad-bhāvaṃ yānti pāda-rajo 'rcanāt

yathā ekāmra-purāṇe--
aho bhajana-māhātmyaṃ vṛndāvana-pater hareḥ /
pumān yoṣid bhaved yatra yoṣid-ātma-samānikā

pādme ca (uttara-khaṇḍe)--
purā maharṣayaḥ sarve daṇḍakāraṇya-vāsinaḥ /
rāmaṃ dṛṣṭvā hariṃ tatra bhoktum aicchan su-vigraham

te sarve strītvam āpannāḥ samudbhūtāś ca gokule /
hariṃ samprāpya kāmena tato muktā bhavārṇavāt

bṛhad-vāmana-siddhāś ca śrutayo 'pi yathā purā /
gopī-bhāvena saṃsevya samudbhūtā hi gokule

yad-uktaṃ śrī-rūpa-gosvāmi-caraṇaiḥ--
hariṃ su-rāga-mārgeṇa sevate yo narottamaḥ /
kevalenaiva sa tadā gopikātvam iyād vraje

bhakti-tattva-kaumudyām--
ekasmin vāsanā-dehe yadi cānyasya bhāvanā /
tarhi tat sāmyam eva syāt yathā vai bharate nṛpe

yathā sanat-kumāra-saṃhitāyām--
śrī-nārada uvāca--
dhanyo 'smy anugṛhīto 'smi tvayā devi na saṃśayaḥ /
harer me naityikī līlā yato me 'dya prakāśitā

śrī-sanat-kumāra uvāca--
ity uktvā tāṃ parikramya tayā cāpi prapūjitaḥ /
antardhānaṃ gato rājan nārado muni-sattamaḥ

mayāpy etad ānupūrvyaṃ sarvaṃ tat parikīrtitam /
japan nityaṃ prayatnena mantra-yugmam anuttamam

kṛṣṇa-vaktrād idaṃ labdhaṃ purā rudreṇa yatnataḥ /
tenoktaṃ nāradāyātha nāradena mayoditam

saṃsārāgni-vināśāya mayāpy etat tavoditam /
tvayā caitad gopanīyaṃ rahasyaṃ paramādbhutam

śrī-ambarīṣa uvāca--
kṛta-kṛtyo 'bhavaṃ sākṣāt tvat prasādād ahaṃ guro /
rahasyātirahasyaṃ yat tvayā mahyaṃ prakāśitam

śrī-sanat-kumāra uvāca--
dharmān etān upādiṣṭo japan mantram ahar niśam /
acirād eva tad-dāsyam avāpsyasi na saṃśayaḥ

ôetān dharmān--aṣṭa-kāla-sevā-rūpān; mantram--yugala-mantram; tad-dāsyam--tayoḥ śrī-rādhā-kṛṣṇayor dāsyaṃ dāsī-bhāvamö iti /
mayāpi gamyate rājan guror āyatanaṃ mama /
vṛndāvane yatra nityaṃ gurur me 'sti sadāśivaḥ