Rādhākṛṣṇāṣṭakālīyalīlāsmaraṇakramapaddhati · Verses 161-171

dvātriṃśad-akṣarādīnāṃ mantrāṇāṃ krameṇa phalaṃ yathā pādme--
dvātriṃśad-akṣaraṃ mantraṃ nāma-ṣoḍaśakānvitam /
prajapan vaiṣṇavo nityaṃ rādhā-kṛṣṇa-sthalaṃ labhet

gautamīya-tantre ca--
ahar-niśaṃ japen mantraṃ mantrī niyata-mānasaḥ /
sa paśyati na sandeho gopa-rūpiṇam īśvaram

gaurī-tantre ca--
śrīmad-aṣṭākṣaraṃ mantraṃ rādhāyāḥ prema-siddhi-dam /
prajapet sādhako yas tu sa rādhāntikam āpnuyāt

sanat-kumāra-saṃhitāyām--
japed yaḥ kāma-gāyatrīṃ kāma-bīja-samanvitām /
tasya siddhir bhavet prema rādhā-kṛṣṇa-sthalaṃ vrajet

etāṃ pañca-padīṃ japtvā śraddhayā 'śraddhayāsakṛt /
vṛndāvane tayor dāsyaṃ gacchaty eva na saṃśayaḥ

kiśorī-tantre ca--
etān sakhīnām aṣṭānāṃ mantrān yaḥ sādhako japet /
śrī-rādhā-kṛṣṇayoḥ kṣipraṃ vihāra-sthalam āpnuyāt

tatraiva--
mantrān etān mañjarīṇām aṣṭānāṃ yo japet sadā /
prema-siddhir bhavet tasya śrī-vṛndāvanam āpnuyāt

smaraṇānantaraṃ siddha-dehasyaiva ca sādhakaḥ /
aṣṭa-kāloditāṃ līlāṃ saṃsmaret sādhakāṅgakaḥ

kālau niśānta-pūrvāhnāv aparāhna-pradoṣakau /
vijñeyau tri-tri-ghaṭikau prātaḥ sāyaṃ dvayaṃ dvayam

dvi-dvi-praghaṭikau jñeyau madhyāhna-rātrikāv iti

eteṣu samayeṣv evaṃ yā yā līlā puroditā /
tāṃ tām eva yathā-kālaṃ saṃsmaret sādhako janaḥ