Rādhākṛṣṇāṣṭakālīyalīlāsmaraṇakramapaddhati · Verses 121-140

ekayā kalayā dvābhyāṃ mathurā-dvārakādhipau /
vṛndāvana-pate rūpau pūrṇau sve sve pade rase

mathurā-nātho vṛndāvanādhipāpekṣayā svarūpeṇa līlayā ca ekayā kalayā ūnaḥ /
mathurā-līlāyāṃ mathurāyāṃ ca sampūrṇa-ṣoḍaśa-kalaḥ /
tathā dvārakā-nātho vṛndāvanādhipāpekṣayā svarūpeṇa līlayā ca /
dvābhyāṃ kalābhyām ūnaḥ /
dvārakāyāṃ dvārakā-līlāyāṃ ca pūrṇa-ṣoḍaśa-kalaḥ /
śrīr bhū-līlā yogamāyā cintyācintyā tathaiva ca /
mohinī kauśalīty aṣṭau bahiraṅgāś ca śaktayaḥ

līlā prema-svarūpā casthāpany ākarṣaṇī tathā /
saṃyoginī viyoginyā-hlādinīty antaraṅgikā

vraje śrī-kṛṣṇa-candrasya santi ṣoḍaśa-śaktayaḥ /
poṣikā madhurasyaiva tasyaitā vai sanātanāḥ

hlādinī ya mahā-śaktiḥ sarva-śakti-varīyasī /
tat-sāra-bhāva-rūpā śrī-rādhikā parikīrtitā

tayā śrī-kṛṣṇa-candrasya kriḍāyāḥ samaye mune /
tad-āviṣṭaṃ vāsudevaṃ saha kṣīrābdhi-nāyakam

antarīkṣya-gataṃ kuryāc chaktir ākarṣaṇī hareḥ /
krīḍānte sthāpayet tantu sthāpanī kṛṣṇa-dehataḥ

sampūrṇa-ṣoḍaśa-kalaḥ kevalo nanda-nandanaḥ /
vikrīḍan rādhayā sārdhaṃ labhate paramaṃ sukham

śrī-nārada uvāca--
gate madhu-purīṃ kṛṣṇe vipralambha-rasaḥ katham /
vāsudeve rādhikāyāḥ saṃśayaṃ chindhi me prabho

śrī-sadāśiva uvāca--
śaktiḥ saṃyoginī kāmā vāmā śaktir viyoginī /
hlādinī kīrtidā-putrī caivaṃ rādhā-trayaṃ vraje

mama prāṇeśvaraḥ kṛṣṇas tyaktvā vṛndāvanaṃ kvacit /
kadācin naiva yātīti jānīte kīrtidā-sutā

kāmā-vāme na jānīta iti ca brahma-nandana /
rāsārambha ivāntardhiṃ gatavān nanda-nandanaḥ

mathurāṃ mathurā-nātho vāsudevo jagāma ha /
antar-hite nanda-sute śrīmad-vṛndāvane mune

pravāsākhyaṃ rasaṃ lebhe rādhā vai kīrtidā-sutā /
tato vadanti munayaḥ pravāsaṃ saṅga-vicyutim

mama jīvana-netā ca tyaktvā māṃ mathurāṃ gataḥ /
iti vihvalitā vāmā rādhā yā virahād abhūt

yamunāyāṃ nimagnā sā prakāśaṃ gokulasya ca /
golakaṃ prāpya tatrābhūt saṃyoga-rasa-peśalā

kāmā rādhā ca mathurā-viraheṇa nipīḍitā /
kurukṣetraṃ gatā tīrtha-yātrā-parama-lālasā

nanda-nandana-bhāva-jña uddhavo vrajam āgataḥ /
sāntvayiṣyan kīrtidāyāḥ sutāṃ māsa-dvaye gate

rādhām āsvādayāmāsa śrīmad-bhāgavatārthakaṃ /
kathāyāṃ bhāgavatyāntu jātāyāṃ muni-puṅgava

vrajendra-nandanaḥ śrīmāṃs tadā pratyakṣatāṃ gataḥ