Paraśurāmakalpasūtra · Chapter 9

9. Khaṇḍa: Homa--vidhi
atha sveṣṭa-mantrasya homa-vidhānaṃ vyākhyāsyāmaḥ

catur-asraṃ kuṇḍam athavā hastâyāmam aṅguṣṭhonnataṃ sthaṇḍilaṃ kṛtvā

sāmānyârghyam upaśodhya tenâvokṣya

prācīr udīcīs tisras tisro rekhā likhitvā

tāsu rekhāsu brahma-yama-soma-rudra-viṣṇv-indrān, ṣaṭtārī-namas-sampuṭitān abhyarcya

sahasrârciṣe hṛdayāya namaḥ, svasti-pūrṇāya śirase svāhā, uttiṣṭha puruṣāya śikhāyai vaṣaṭ, dhūma-vyāpine kavacāya huṃ, sapta-jihvāya netra-trayāya vauṣaṭ, dhanur-dharāya astrāya phaṭ - iti ṣaḍ-aṅgaṃ vidhāya tena ṣaḍ-aṅgena kuṇḍam abhyarcya

tatrâṣṭa-koṇa-ṣaṭ-koṇa-tri-koṇâtmakaṃ agni-cakraṃ vilikhya pītāyai śvetāyai aruṇāyai kṛṣṇāyai dhūmrāyai tīvrāyai sphuliṅginyai rucirāyai jvālinyai nama iti tri-koṇa-madhye vahneḥ pīṭha-śaktīḥ sampūjya - taṃ tamase, raṃ rajase, saṃ sattvāya, ām ātmane, am antarātmane, paṃ paramâtmane, hrīṃ jñānâtmane namaḥ - iti tatraivâbhyarcayet

tato janiṣyamāṇa-vahneḥ pitarau vāgīśvarī-vagīśvarau pīṭhe 'bhyarcya tayor mithunībhāvaṃ bhāvayitvā hrīṃ vāgīśvarī-vāgīśvarābhyāṃ namaḥ - iti dhyātvā

araṇeḥ sūrya-kāntāt dvija-gṛhād vā vahnim utpādya mṛt-pātre tāmra-pātre vā āgneyyām aiśānyāṃ nairṛtyāṃ vā nidhāya, agni-śakalaṃ krāvyādâṃśaṃ nairṛtyāṃ visārya nirīkṣaṇa-prokṣaṇa-tāḍanâvakuṇṭhanâdibhiḥ viśodhya [248] oṃ vaiśvānara jātaveda ihâvaha lohitâkṣa sarva-karmāṇi sādhaya svāhā - iti mūlâdhārodgata-saṃvidaṃ lalāṭa-netra-dvārā nirgamayya taṃ bāhyâgni-yuktaṃ pātayet

kavaca-mantreṇa indhanair ācchādya

agniṃ prajvalitaṃ vande jātavedaṃ hutâśanam |
suvarṇa-varṇam analaṃ samiddhaṃ viśvato-mukham ||
ity upasthāya

uttiṣṭha harita-piṅgala lohitâkṣa sarva-karmāṇi sādhaya me dehi dāpaya svāhā - iti vahnim utthāpya

cit-piṅgala hana hana daha daha paca paca sarva-jñâjñāpaya svāhā, iti prajvālya

ṣaṭtāra-vāco namo-mantreṇa puṃsavana-sīmanta-jātakarma-nāmakaraṇânnaprāśana-caulopanayana-godāna-vivāha-karmāṇy amukâgner amukaṃ karma kalpayāmi namaḥ - iti vidhāya

pariṣicya paristīrya paridhāya

tri-ṇayanam aruṇâbhaṃ baddha-mauliṃ suśuklâṃ-
śukam aruṇam anekâkalpam ambhoja-saṃstham |
abhimata-vara-śakti-svastikâbhīti-hastaṃ
namata kanaka-mālâlaṅkṛtâṃsaṃ kṛśânum ||
iti dhyātvā

(1) aṣṭa-koṇe jātavedase sapta-jihvāya havya-vāhāya aśvodarāya vaiśvānarāya kaumāra-tejase viśva-mukhāya deva-mukhāya namaḥ - iti (2) ṣaṭ-koṇe ṣaḍ-aṅgaṃ (3) tri-koṇe agni-mantreṇa agniṃ pūjayitvā

hiraṇyāyai kanakāyai raktāyai kṛṣṇāyai suprabhāyai atiraktāyai bahu-rūpāyai namaḥ - ity agneḥ sapta-jihvāsu mūla-śuddhenâjyena saptâhutīḥ kuryāt

vaiśvānarottiṣṭha-cit-piṅgalair agnes tridhā ''hutiṃ vidhāya

bahu-rūpa-jihvāyām iṣṭāṃ devatām āvāhya pañcopacārair upacarya

sarvāsāṃ cakra-devīnām ekâhutiṃ hutvā, namo-'ntān pādukā-'ntān śeṣān mantrān svāhā-'ntān vidhāya juhuyāt

atha pradhāna-devatāyai daśâhutīr juhuyāt

yadi kāmyam īpsed abhīṣṭa-devatāyai vijñāpya saṅkalpaṃ kṛtvaitāvat-karma-siddhy-artham etāvad-āhutīḥ kariṣyāmîti

tilâjyaiḥ śāntyā - annenânnāyâmṛtāya - samic-cūta-pallavair jvara-śamāya - dūrvābhir āyuṣe - kṛta-mālair dhanāyotpalair bhāgāya - bilva-dalai rājyāya - padmaiḥ [252] sāmrājyāya - śuddha-lājaiḥ kanyāyai - nandy-āvartaiḥ kavitvāya - vañjulaiḥ puṣṭayai - mallikā-jātī-punnāgair bhāgyāya - bandhūka-japā-kiṃśuka-bakula-madhukarair aiśvaryāya - lavaṇair ākarṣaṇāya - kadambaiḥ sarva-vaśyāya - śāli-taṇḍulair dhānyāya - kuṅkuma-gorocanâdi-sugandhaiḥ saubhāgyāya - palāśa-puṣpaiḥ kapilā-ghṛtair vā tejase - dhattūra-kusumair unmādāya - viṣa-vṛkṣaiḥ nimba-śleṣmātaka-vibhītaka-samidbhiḥ śatru-nāśāya - nimba-tailâkta-lavaṇair māraṇāya - kākolūka-pakṣair vidveṣaṇāya - tila-tailâkta-marīcaiḥ kāsa-śvāsa-nāśāya - juhuyāt

baliṃ pradāya

oṃ bhūr agnaye ca pṛthivyai ca mahate ca svāhā |
oṃ bhuvo vāyave cântarikṣāya ca mahate ca svāhā |
oṃ suvar ādityāya ca dive ca mahate ca svāhā |
oṃ bhūr bhuvas suvaś candramase ca nakṣatrebhyaś ca digbhyaś ca mahate ca svāhā |
iti caturbhir mantraiḥ mahā-vyāhṛti-homaṃ kṛtvā

itaḥ pūrvaṃ prāṇa-buddhi-deha-dharmâdhikārato jāgrat-svapna-suṣupty-avasthāsu manasā vācā karmaṇā hastābhyāṃ padbhyām udareṇa śiśnā yat smṛtaṃ yad uktaṃ [254] yat kṛtaṃ tat sarvaṃ brahmârpaṇaṃ bhavatu svāhā, iti brahmârpaṇâhutiṃ kṛtvā

cid-agniṃ devatāṃ câtmany udvāsayāmi namaḥ - ity udvāsya

tad-bhasma-tilaka-dharo loka-sammohana-kāraḥ sukhī viharet | iti śivam