Paraśurāmakalpasūtra · Chapter 8

8. Khaṇḍa: Parā-krama
iti vidhivat kṛta-vārtālī-varivasyaḥ siṃhâsana-vidyā-hṛdayam anuttaraṃ parā-bīja-rūpaṃ dhāma tat-krama-pūrvaṃ vimṛśet

prabhu-hṛdaya-jñātuḥ pade pade sukhāni bhavanti

atho 'nuttara-paddhatiṃ vyākhyāsyāmāḥ

kalye samutthāya brahma-koṭara-vartini sahasra-dala-kamale sanniviṣṭāyāḥ sauvarṇa-rūpāyāḥ parāyāś caraṇa-yugala-vigalad-amṛta-rasa-visara-pariplutaṃ vapuḥ dhyātvā

snātaḥ śuci-vāso-vasānaḥ, sauḥ-varṇena trir ācamya, dviḥ parimṛjya, sakṛd upaspṛśya, cakṣuṣī, nāsike, śrotre, aṃse, nābhiṃ, hṛdayaṃ, śiraś câvamṛśya, evaṃ trir ācamya

ūrṇā-mṛdu-śucitamam āsanaṃ sau-varṇa-sūrya-japâbhimantritaṃ mūla-mantrokṣitam adhiṣṭhāya

udag-vadano maunī bhūṣita-vigraho mūla-pūrveṇa deśika-manunā mastake deśikam iṣṭvā

vāma-pārṣṇi-ghātaiḥ choṭikā-trayeṇa pātālâdi-gatān bhedâvabhāsinaḥ vighnān utsārya

śiro-mukha-hṛn-mūla-sarvâṅgeṣu mūlaṃ vinyasya

kāka-cañcūpuṭâkṛtinā mukhena saṃcoṣyânilaṃ saptaviṃśatiśo mūlaṃ japtvā vedyaṃ nābhau saṃmudrya punaḥ saptaviṃśatiśo japtvā aṅguṣṭhena śikhāṃ badhvā punar anilam āpūrya tena mūle cid-agnim utthāpya tatra vedyasya vilayaṃ vibhāvya

gomayenopalipta-catur-asra-bhū-tale pravahat-pārśva-kara-kṛtayā matsya-mudrayā divya-gandhâmbu-yutayā bhū-vyoma-vāyu-vahni-maṇḍalāni kṛtvā

śyāmā-vat sāmānya-viśeṣârghye sādayet

sarve 'pi parā-krama-manavaḥ sauḥ varṇa-pūrvāḥ kāryāḥ

bhṛgu-caturdaśa-ṣoḍaśa-dvir-āvṛtyā, varṇa-ṣaḍ-aṅgaṃ sarva-mūla-ṣaḍ-āvṛtyā, mantra-ṣaḍ-aṅgaṃ ca, kṛtvā

ubhābhyām arcayitvā

mūlam uccārya, tāṃ cinmayīm ānanda-lakṣaṇām amṛta-kalaśa-piśita-hasta-dvayāṃ, prasannāṃ, devīṃ, pūjayāmi namaḥ svāhā - iti sudhā-devīm abhyarcya tayā samprokṣya varivasyā--vastūni

pūrvaṃ nābhau sammudritaṃ cid-agni-vilīnaṃ taptâyo-drava-vat ṣaṭtriṃśat-tattva-kadambakaṃ hṛt-saroje samānīya

mūla-japtaiḥ kusuma-kṣepaiḥ vakṣyamāṇaiś ca mantrair āsana-kḷptiṃ kuryāt - mūlâdi-yoga-pīṭhāya namaḥ - ity antāni tāni ca pṛthivy-ap-tejo-vāyv-ākāśa-gandha-rasa-rūpa-sparśa-śabdopastha-pāyu-pāda-pāṇi-vāg-ghrāṇa-jihvā-cakṣus-tvak-śrotrâ- [243] haṅkāra-buddhi-manaḥ-prakṛti-puruṣa-niyati-kāla-rāga-kalâvidyā-māyā-śuddhavidyeśvara-sadāśiva-śakti-śivāḥ | evaṃ parā-cakraṃ kṛtvā

tatraitad-aikya-vimarśa-rūpiṇīṃ ṣoḍaśa-kalāṃ parāṃ devīm āvāhya

akalaṅka-śaśâṅkâbhā try-akṣā candra-kalā-vatī |
mudrā-pusta-lasad-bāhuḥ pātu māṃ, paramā kalā ||
iti dhyātvā

mūlâdim uccārya prakāśa-rūpiṇī parā-bhaṭṭārikā, mūla-madhyam uccārya vimarśa-rūpiṇī parā-bhaṭṭārikā, mūlântyam uccārya prakāśa-vimarśa-rūpiṇī parā-bhaṭṭāriketi tribhiḥ devyā mūla-hṛn-mukheṣv abhyarcya samastam uccārya, mahā-prakāśa-vimarśa-rūpiṇī parā-bhaṭṭāriketi, daśavāram avamṛśya tām eva devīṃ, kālâgni-koṭi-dīptāṃ dhyātvā

tasyāṃ kriyā-samabhivyāhāreṇa vedyam akhilaṃ hutvā

mūlam uccārya, sāmānya-pādukayā sva-mastaka-sthāya gurave arghyaṃ nivedya

punaś cid-agnim uddīptaṃ vibhāvya

divyaughaṃ tisraḥ pādukāḥ siddhaughaṃ tisraḥ mānavaugham aṣṭāv abhyarcya

parābhaṭṭārikā-'ghora-śrīkaṇṭha-śaktidhara-krodha-tryambakânanda-pratibhādevyambā, vīrasaṃvidānanda-madhurādevyambā, jñāna-śrīrāma-yogāḥ - iti, parā-krama-pādukāḥ

tataḥ kalā-manunā baliṃ nivedya

haviś-śeṣam ātma-sātkuryāt | iti śivam