Paniniya Shiksha · Chapter p10

yathā saurāṣṭrikā nārī takram̐ ityabhibhāṣate /
evaṃ raṅgāḥ prayoktavyāḥ khe arām̐ iva khedayā

raṅgavarṇān prayuñjīranno grasetpūrvamakṣaram /
dīrghasvaraṃ prayuñjīyātpaścānnāsikyamācaret

hṛdaye caikamātrastvarddhamātrastu mūrdhani /
nāsikāyāṃ tathārddhaṃ ca raṅgasyaivaṃ dvimātratā

hṛdayādutkare tiṣṭhankāṃsyena samanusvaran /
mārdavaṃ ca dvimātraṃ ca jaghanvām̐ iti nidarśanam

madhye tu kampayetkampamubhau pārśvau samau bhavet /
saraṅgaṃ kampayetkampaṃ rathīveti nidarśanam

evaṃ raṃgāḥ prayoktavyā nāvyaktā na ca pīḍitāḥ /
samyagvarṇaprayogeṇa brahmaloke mahīyate