Scripture Library

Paippalāda-Saṃhitā · Chapter 5.17

5.17.1

devainasād unmaditaṃ
kṣetriyāc chapathād uta |
muñcantu tasmāt tvā devā
unmattaṃ rakṣasas pari ||

5.17.2

muniṃ bhavantaṃ pari yāni vāvṛtū
rakṣāṃsy agna ululā karikratu |
atas tvaṃ no adhi pāhi vājinn
indreṇa medī bṛhate raṇāya ||

5.17.3

yathāgne devā ṛbhavo manīṣiṇo
munim unmattam asṛjan nir enasaḥ |
evā te śakro abhayaṃ kṛṇotu
mucyasvainaso vi nayāmi rakṣaḥ ||

5.17.4

yathā gāvaś ca bhūmyāṃ
puruṣāś ca nyokasaḥ |
evonmattasya te mune
gṛhṇātu pṛthivī manaḥ ||

5.17.5

muniṃ dādhāra pṛthivī
muniṃ dyaur abhi rakṣati |
muniṃ hi viśvā bhūtāni
munim indro adīdharat
parā rakṣaḥ suvāmi te ||

5.17.6

imaṃ me agne puruṣaṃ mumugdhi
ya āvitto grāhyā lālapīti |
ato *'dhi te kṛṇavad bhāgadheyam
anunmadito agado yathāsat ||

5.17.7

agniṣ ṭe ni śamayatu
yat ta etan mana uhyate |
juhomi vidvāṃs te havir
yathānunmadito bhuvaḥ ||

5.17.8

punas tvā dur apsarasaḥ
punar vātaḥ punar diśaḥ |
punar yamaḥ punar yamasya dūtās
te tvā muñcantv aṃhasaḥ |
jivātave na martave
'tho ariṣṭatātaye ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0