Paippalāda-Saṃhitā · Chapter 5.16
dyauś cemaṃ yajñaṃ pṛthivī ca saṃ duhātāṃ
mātariśvā pavamānaḥ purastāt |
tvaṣṭā vāyuḥ saha somena vāta
imaṃ saṃ duhrām anapasphurantaḥ ||
gharmaṃ tapāmy amṛtasya dhārayā
devebhyo havyaṃ paride savitre |
śukraṃ devāḥ śṛtam adantu havyam
āsañ juhvānam amṛtasya yonau ||
ud vāsayāgneḥ śṛtam akarma havyam
ā roha pṛṣṭham amṛtasya dhāma |
vanaspataya upa barhi stṛṇīta
madhvā samantaṃ ghṛtavat karātha ||
yo 'psu yakṣmaḥ śamayāmi taṃ va
ūrjā gavyūtiṃ sam anajmy etām |
stanyaṃ kṣīram aviṣaṃ vaḥ kṛṇomy
asuṃ dhayanto 'pi yūtham eta ||
iḍānāṃ putrā uta mitriyāṇāṃ
payo dhayantv ahṛṇīyamānāḥ |
ṛtubhiḥ sasyam uta kl̥ptam astv
iryo gopā rakṣatu vāyur enāḥ ||
pibata ghṛtaṃ yatidhā va etad
guhā hitaṃ nihitaṃ mānaveṣu |
viśve devā vaiśvadevaś cāgnau
yathābhāgaṃ haviṣo mādayadhvam ||
yo devānām asi śreṣṭho
rudras tanticaro vṛṣā |
ariṣṭā asmākaṃ vīrā
etad astu hutaṃ tava ||
pūrṇam ahaṃ karīṣiṇaṃ
śatavantaṃ sahasriṇam |
viśvebhir agne devair
imaṃ goṣṭhaṃ sahāruham ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0