Scripture Library

Paippalāda-Saṃhitā · Chapter 5.18

5.18.1

uta devā avahitaṃ
devā ud dharatā punaḥ |
uto mariṣyantaṃ devā
daivāḥ kṛṇutha jīvase ||

5.18.2

ā tvāgamaṃ śaṃtātibhir
atho ariṣṭatātibhiḥ |
dakṣaṃ te bhadram āhārṣaṃ
parā suvāmy āmayat ||

5.18.3

dvāv imau vātau vāta
ā sindhor ā parāvataḥ |
dakṣaṃ te anya ā vātu
parānyo vātu yad rapaḥ ||

5.18.4

ā vāta vāhi bheṣajaṃ
vi vāta vāhi yad rapaḥ |
tvaṃ hi viśvabheṣajo
devānāṃ dūta īyase ||

5.18.5

trāyantām imaṃ devās
trāyantāṃ maruto gaṇaiḥ |
trāyantāṃ viśvā bhūtāni
yathāyam agado 'sati ||

5.18.6

ghṛtena dyāvāpṛthivī
ghṛtenāpaḥ sam ukṣata |
ghṛtena mucyasvainaso
yad ātmakṛtam āritha ||

5.18.7

ayaṃ me hasto bhagavān
ayaṃ me bhagavattaraḥ |
ayaṃ me viśvabheṣajo
'yaṃ śivābhimarśanaḥ ||

5.18.8

hastābhyāṃ daśaśākhābhyāṃ
jihvā vācaḥ purogavī |
anāmayitnubhyāṃ śaṃbhubhyāṃ
tābhyāṃ tvābhi mṛśāmasi ||

5.18.9

āpa id vā u bheṣajīr
āpo amīvacātanīḥ |
āpo viśvasya bheṣajīs
tās te kṛṇvantu bheṣajam ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0