Scripture Library

Paippalāda-Saṃhitā · Chapter 4.23

4.23.1

prajāpatiṣ ṭvā badhnāt prathamam
astṛtaṃ vīryāya kam |
taṃ te badhnāmy āyuṣe varcasa
ojase ca balāya ca-
- astṛtas tvābhi rakṣatu ||

4.23.2

ūrdhvas tiṣṭha rakṣann apramādam astṛtemaṃ
mā tvā dabhan paṇayo yātudhānāḥ |
indra iva dasyūn ava dhūnuṣva pṛtanyataḥ
sarvāñ chatrūn vi ṣahasva-
-astṛtas tvābhi rakṣatu ||

4.23.3

śataṃ cana praharanto
'bhighnanto na tastrire |
tasminn indraḥ pary adatta
cakṣuḥ prāṇam atho balam
astṛtas tvābhi rakṣatu ||

4.23.4

indrasya tvā varmaṇā pari dhāpayāmo
yo devānām adhirājo babhūva |
puras tvā devāḥ pra ṇayantu sarve
'stṛtas tvābhi rakṣatu ||

4.23.5

asmin maṇāv ekaśataṃ vīryāṇi
sahasraṃ prāṇā asminn astṛte |
vyāghraḥ śatrūn adhi tiṣṭha sarvān
yas tvā pṛtanyād adharaḥ so 'stv
astṛtas tvābhi rakṣatu ||

4.23.6

ghṛtād ullupto madhumān payasvān
sahasraprāṇaḥ śatayonir vayodhāḥ |
śambhūś ca mayobhūś ca-
-ūrjasvāṃś ca payasvāṃś ca-
-astṛtas tvābhi rakṣatu ||

4.23.7

yathā tvam uttaro aso
asapatnaḥ sapatnahā |
sajātānām aso vaśī
tathā tvā savitā karad
astṛtas tvābhi rakṣatu ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0