Scripture Library

Paippalāda-Saṃhitā · Chapter 4.15

4.15.1

saṃ majjā majjñā bhavatu
sam u te paruṣā paruḥ |
saṃ te rāṣṭrasya visrastaṃ
saṃ snāva sam u parva te ||

4.15.2

majjā majjñā saṃ dhīyatām
asthnāsthy api rohatu |
snāva te saṃ dadhmaḥ snāvnā
carmaṇā carma rohatu ||

4.15.3

loma lomnā saṃ dhīyatāṃ
tvacā saṃ kalpayāt tvacam |
asṛk te asnā rohatu
māṃsaṃ māṃsena rohatu ||

4.15.4

rohiṇī saṃrohiṇy
asthnaḥ śīrṇasya rohiṇī |
rohiṇyām ahni jātāsi
rohiṇy asy oṣadhe ||

4.15.5

yadi śīrṇaṃ yadi dyuttam
asthi peṣṭraṃ ta ātmanaḥ |
dhātā tat sarvaṃ kalpayāt
saṃ dadhat paruṣā paruḥ ||

4.15.6

yadi vajro visṛṣṭas tvāra
kāṭaṃ patitvā yadi vā viriṣṭam |
vṛkṣād vā yad avasad daśaśīrṣa
ṛbhū rathasyeva saṃ dadhāmi te paruḥ ||

4.15.7

ut tiṣṭha prehi sam adhāyi te paruḥ
saṃ te dhātā dadhātu tanvo viriṣṭam |
rathaḥ sucakraḥ supavir yathaiti
sukhaḥ sunābhiḥ prati tiṣṭha evam ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0