Paippalāda-Saṃhitā · Chapter 20.60

ṛcaṃ sāma yad aprākṣaṃ
havir ojo yajur balam |
etaṃ mā tasmān mā hiṃsīd
vedaḥ pṛṣṭaḥ śacīpate ||

ud bhare dyāvāpṛthivī sahauṣadhībhiḥ |
gṛhṇāmi prajāṃ nir apaḥ sṛjāmi ||

mā na āpo medhāṃ
mā brahma pra mathiṣṭana |
suṣyadā yūyaṃ syandadhvam
upahūto 'haṃ sumedhā varcasvī ||

mā no medhāṃ mā no dīkṣāṃ
mā no hiṃsiṣṭa yat tapaḥ |
śivā naḥ sarva āyuṣa
āpo bhavantu mātaraḥ ||

iha prajā viśvarūpā ramantām
asmin goṣṭhe viśvabhṛto janitrīḥ |
agniṃ kulāyam upa saṃviśantīr
jānantu naḥ payasā ghṛtena ||

rantaya stha ramataya stha
mayi śrita stha mayi śrayadhvam |
manotā nāma stha grāmyā apsaraso
veda vo vittam ā mā viśata ||

śarva nīlaśikhaṇḍa
vīra karmaṇikarmaṇi |
imām asya prāśaṃ jahi
yenedaṃ vivadāmahe ||

tṛtīyakaṃ vitṛtīyaṃ sadandiṃ
takmānam uta rājayakṣmam |
yathā śakra unmumoca tṛtīyakam
evāhaṃ tad un muñcāmi
tṛtīyakaṃ tam asyām
oṣadhyāṃ badhnāmi ||

ādhvastapakṣṇe bṛhate
pathe 'ham akaraṃ namaḥ ||

indrāya tviṣīmate pathe 'ham akaraṃ namaḥ ||