Scripture Library

Paippalāda-Saṃhitā · Chapter 20.59

20.59.1

paiśir mātā peśiḥ pitā
paiśeyaḥ peśyā hataḥ |
addhā kṛtasya brahmaṇā
vṛścikasyārasaṃ viṣam ||

20.59.2

nir hvayāmi parṇasādān
nir ut pucchād u te viṣam |
bhūmis ta ucyate mātā
tasyai te nama it sṛja ||

20.59.3

kim u danta āmayati
kim abhūd upaveśanam |
āpo nir asyatā krimim
agade kṛṇutā hanū ||

20.59.4

yatra bhūmyā anāmṛtaṃ
divi candramasi śritam |
vidvām̐ ahaṃ tatra manye
māhaṃ pautram aghaṃ ni gām ||

20.59.5

yat te susīme hṛdayam
ado vai tat prajāpatau |
vedāma tasya te vayaṃ
(māhaṃ pautram aghaṃ ni gām) ||

20.59.6

yat suvarṇāyā hṛdayaṃ
pṛthivyām adhi niṣṭhitam |
vedāhaṃ tasyās tan nāma
(māhaṃ pautram aghaṃ ni gām) ||

20.59.7

agner hṛdayam asi
vidyut tat tvā tathā veda |
māhaṃ pautram aghaṃ ni gām ||

20.59.8

prajā ime prajāpata
indrāgnī śarma yacchatam |
yathāhaṃ jyog ihāsāni
prajānām adhipā vaśī ||

20.59.9

yāṃ prajām avidām ady -
- ātmanaḥ parinirmitām |
āyuṣmatīṃ tanūkṛtāṃ
tām̐ agne jarase naya ||

20.59.10

indra ivāsāni sāsahir
agnir iva jyotiṣā bṛhan |
sūrya iva viśvataḥ pratyak
samudra iva duṣṭaraḥ ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0