પૈપ્પલાદ-સંહિતા · અધ્યાય 20.60

ઋચં સામ યદ્ અપ્રાક્ષં
હવિર્ ઓજો યજુર્ બલમ્ ।
એતં મા તસ્માન્ મા હિંસીદ્
વેદઃ પૃષ્ટઃ શચીપતે ॥

ઉદ્ ભરે દ્યાવાપૃથિવી સહૌષધીભિઃ ।
ગૃહ્ણામિ પ્રજાં નિર્ અપઃ સૃજામિ ॥

મા ન આપો મેધાં
મા બ્રહ્મ પ્ર મથિષ્ટન ।
સુષ્યદા યૂયં સ્યન્દધ્વમ્
ઉપહૂતો ઽહં સુમેધા વર્ચસ્વી ॥

મા નો મેધાં મા નો દીક્ષાં
મા નો હિંસિષ્ટ યત્ તપઃ ।
શિવા નઃ સર્વ આયુષ
આપો ભવન્તુ માતરઃ ॥

ઇહ પ્રજા વિશ્વરૂપા રમન્તામ્
અસ્મિન્ ગોષ્ઠે વિશ્વભૃતો જનિત્રીઃ ।
અગ્નિં કુલાયમ્ ઉપ સંવિશન્તીર્
જાનન્તુ નઃ પયસા ઘૃતેન ॥

રન્તય સ્થ રમતય સ્થ
મયિ શ્રિત સ્થ મયિ શ્રયધ્વમ્ ।
મનોતા નામ સ્થ ગ્રામ્યા અપ્સરસો
વેદ વો વિત્તમ્ આ મા વિશત ॥

શર્વ નીલશિખણ્ડ
વીર કર્મણિકર્મણિ ।
ઇમામ્ અસ્ય પ્રાશં જહિ
યેનેદં વિવદામહે ॥

તૃતીયકં વિતૃતીયં સદન્દિં
તક્માનમ્ ઉત રાજયક્ષ્મમ્ ।
યથા શક્ર ઉન્મુમોચ તૃતીયકમ્
એવાહં તદ્ ઉન્ મુઞ્ચામિ
તૃતીયકં તમ્ અસ્યામ્
ઓષધ્યાં બધ્નામિ ॥

આધ્વસ્તપક્ષ્ણે બૃહતે
પથે ઽહમ્ અકરં નમઃ ॥

ઇન્દ્રાય ત્વિષીમતે પથે ઽહમ્ અકરં નમઃ ॥