Paippalāda-Saṃhitā · Chapter 20.58

veda vai te takman nāma
viśvaso nāma vā asi |
asamaratho nāma te pitā
hārṣī nāma takman te mātā
śimidā nāma te svasā ||

giriṃ gaccheti sāptamikī ||

asurās tvod ava bharan
samudrād adhi māyayā |
tad āsrāvasya bheṣajaṃ
tad u rogam anīnaśat ||

rogasthānam asṛksthānam
atho āsrāvabheṣajam |
babhror aśvasya vāreṇ-
-āpi nahyāmi tā aham ||

yan me daṇḍo vāpāti
dīkṣayā tapasā saha |
tam ahaṃ punar ā dade
punar indraḥ punar bhagaḥ |
punar me brahmaṇaspatir
brahma jīvitavā adāt ||

itthād ulūkāpa tanvan
uttānapādam arbhakaḥ |
sa me premāṇam ā vahad
apa dveṣaḥ parā vahat ||

yathā bāṇaḥ susaṃśitaḥ
parāpataty āśumat |
evā mūtrasya te dhārā
parā patati ketumat ||

yathā madhu madhukṛtaḥ
saṃbharanti madhāv adhi |
evā me madhumad vaco
deveṣu puruṣeṣu ca ||

dīrghāyutvāya tapase
mahyā ariṣṭatātaye |
suparṇo mahyam abravīd
etad utsaktabheṣajam
etat puliśabheṣajam ||

agnī rakṣāṃsīty ekā ||