Paippalāda-Saṃhitā · Chapter 20.56

etad yad anyatra jigāṃsatha
yad anyatra vivīṣatha |
tad vaś cittam amūmuhaṃ
tad vaś cittam anīnaśam ||

asti vai pathāṃ niṣkuṭaṃ
nadīnāṃ ca niraṅkaśam |
tena vaś cittam amūmuhaṃ
tena vaś cittam anīnaśam ||

yāni vaḥ sapta cetāṃsy
aṣṭau yāni manāṃsi ca |
tad vaś cittam amūmuhaṃ
tad vaś cittam anīnaśam ||

indreṇa medinā yuj-
-āgninā jātavedasā |
tena vaś cittam amūmuhaṃ
tena vaś cittam anīnaśam ||

pratīcīnāṃ vo abhy adhām
aśvam ivāśvābhidhānyā |
kṛṇve vo māmake vaśe
pador upānahau yathā ||

devānāṃ saṃsad asi
devānāṃ yātur asi |
yayā tanvā brahma jinvasi
tayā mā jinva ||

roce mā prakāśe mā
kaṇvā vidan mā gamaya |
anu mā budhyantām ||

vayaḥ suparṇā upa sedur indraṃ
priyamedhā ṛṣayo nādhamānāḥ |
apa dhvāntam ūrṇuhi pūrdhi cakṣur
mumugdhy asmān nidhayeva baddhān ||

apsu jātasya mahatas pary aśmanaḥ |
svayaṃjātasya śociṣo
'dbhiḥ parvata nāśaya ||

uttodinīṃ śimidvatī
durgayonir vyadvarām |
mṛgām̐ anu pra pātaya
marīcīr anu nāśaya ||

aśvasyāsnaḥ saṃpatitā
parṇe te vasatiṣ kṛtā |
asṛk patatriṇām asi
jahi vāmūn pra bādhama ||

asṛkto adhi jāto 'si
parṇe te sadanaṃ kṛtam |
āṇḍaṃ patatriṇām asi
jahi vāmūn pra bādhama ||

yathā gardabho vivartanād
vidhūya vipalāyate |
evāsau palāyatām
amuṣmād adhy āyataḥ ||