Scripture Library

Paippalāda-Saṃhitā · Chapter 20.55

20.55.1

adarśi gātuvittamo
yasmin vratāny ādadhuḥ |
upo ṣu jātam āryasya vardhanaṃ
somaṃ gacchantu no giraḥ ||

20.55.2

pra daivodāso agnir
devām̐ acchā na majmanā |
anu mātaraṃ pṛthivīṃ vi vāvṛte
tasthau nākasya sānavi ||

20.55.3

yasmād rejanti kṛṣṭayaś
carkṛtyāni kṛṇvataḥ |
sahasrasā medhasātāv iva tman-
-āgniṃ dhībhir duvasyata ||

20.55.4

ā pyāyasva sam etu te
viśvataḥ soma vṛṣṇyam |
bhavā vājasya saṃgathe ||

20.55.5

ā pyāyasva madintama
soma viśvebhir aṃśubhiḥ |
bhavā naḥ sumnayuḥ sakhā vṛdhe ||

20.55.6

saṃ te payāṃsi sam u yantu vajāḥ
saṃ vṛṣṇyāny abhimātiṣāhaḥ |
āpyāyamāno amṛtāya soma
divi śravāṃsy uttamāni dhiṣva ||

20.55.7

vidma tvā vayaṃ somaṃ
rājānaṃ ye tvā na viduḥ |
teṣāṃ cakṣuṣā śrotreṇa
prāṇena prajayā paśubhir gṛhair dhanenā pyāyasva |
eṣā ta oṣadhīs
tayā tvam ā pyāyasva ||

20.55.8

āpīno asmān āpyāyac
cakṣuṣā śrotreṇa prāṇena prajayā paśubhir gṛhair dhanena ||

20.55.9

yad veda rājā varuṇo
veda devo bṛhaspatiḥ |
indro yad vṛtrahā veda
tat satyaṃ cittamohanam ||

20.55.10

śarveṇa nīlaśikhaṇḍena
bhavena marutāṃ pitrā |
virūpākṣeṇa babhruṇā
vācaṃ vadiṣyato hatāḥ ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0