Paippalāda-Saṃhitā · Chapter 20.52
rātriṃrātrim aprayāmaṃ bharanto
'śvāyeva tiṣṭhate ghāsam asmai |
rāyaspoṣeṇa sam iṣā madanto
mā te agne prativeśā riṣāma ||
āgna āyūṃṣi pavasvā
suvorjam iṣaṃ ca naḥ |
āre bādhasva ducchunām ||
trīṇy āyūṃṣi tava jātavedas
tisro vyuṣṭīr uṣasas te agne |
tisras te tanvo devasaṃśitās
tābhir naḥ pāhi sadam apramādam ||
pāhi no agna ekayā
pāhi na uta dvitīyayā |
pāhi gīrbhis tisṛbhir ūrjāṃpate
pāhi catasṛbhir vaso ||
samīcī māhanī pātām
āyuṣmatyā ṛco mā chitsi |
tanūpāt sāmno
vasuvidaṃ lokam anu carāṇi ||
ya ṛte cid ity ekā ||
bhagehy arvāṅ upa mām iha tvaṃ
mado nāmāsi mayi mādayāmum |
surā ta ekam abhavaj janitram
agner adhi jāto 'si brahmaṇā tejasā ca ||
sahānayā praviśehāntarā mām |
viśanty ehi praviśanty ehy
ā mā viśa pra mā viś-
-opa tvā hvaya upa mā hvayasva |
nariṣṭā nāma vā asi ||
yathāpaḥ pravatā yanti
yathā māsā aharjaram |
evā mā brahmacāriṇo
dhātar ā yantu sarvadā ||
ā ganta mā riṣaṇyata
prastotāro māpa sthāta sumanyavaḥ |
dṛḍhāso amariṣṇavo māvapiṣyavaḥ ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0