પૈપ્પલાદ-સંહિતા · અધ્યાય 20.52

રાત્રિંરાત્રિમ્ અપ્રયામં ભરન્તો
ઽશ્વાયેવ તિષ્ઠતે ઘાસમ્ અસ્મૈ ।
રાયસ્પોષેણ સમ્ ઇષા મદન્તો
મા તે અગ્ને પ્રતિવેશા રિષામ ॥

આગ્ન આયૂંષિ પવસ્વા
સુવોર્જમ્ ઇષં ચ નઃ ।
આરે બાધસ્વ દુચ્છુનામ્ ॥

ત્રીણ્ય્ આયૂંષિ તવ જાતવેદસ્
તિસ્રો વ્યુષ્ટીર્ ઉષસસ્ તે અગ્ને ।
તિસ્રસ્ તે તન્વો દેવસંશિતાસ્
તાભિર્ નઃ પાહિ સદમ્ અપ્રમાદમ્ ॥

પાહિ નો અગ્ન એકયા
પાહિ ન ઉત દ્વિતીયયા ।
પાહિ ગીર્ભિસ્ તિસૃભિર્ ઊર્જાંપતે
પાહિ ચતસૃભિર્ વસો ॥

સમીચી માહની પાતામ્
આયુષ્મત્યા ઋચો મા છિત્સિ ।
તનૂપાત્ સામ્નો
વસુવિદં લોકમ્ અનુ ચરાણિ ॥

ય ઋતે ચિદ્ ઇત્ય્ એકા ॥

ભગેહ્ય્ અર્વાઙ્ ઉપ મામ્ ઇહ ત્વં
મદો નામાસિ મયિ માદયામુમ્ ।
સુરા ત એકમ્ અભવજ્ જનિત્રમ્
અગ્નેર્ અધિ જાતો ઽસિ બ્રહ્મણા તેજસા ચ ॥

સહાનયા પ્રવિશેહાન્તરા મામ્ ।
વિશન્ત્ય્ એહિ પ્રવિશન્ત્ય્ એહ્ય્
આ મા વિશ પ્ર મા વિશ્-
-ઓપ ત્વા હ્વય ઉપ મા હ્વયસ્વ ।
નરિષ્ટા નામ વા અસિ ॥

યથાપઃ પ્રવતા યન્તિ
યથા માસા અહર્જરમ્ ।
એવા મા બ્રહ્મચારિણો
ધાતર્ આ યન્તુ સર્વદા ॥

આ ગન્ત મા રિષણ્યત
પ્રસ્તોતારો માપ સ્થાત સુમન્યવઃ ।
દૃઢાસો અમરિષ્ણવો માવપિષ્યવઃ ॥