Scripture Library

Paippalāda-Saṃhitā · Chapter 20.39

20.39.1

apehi takmaṃś cara paro anyam
asmad iccha puruṣaṃ kaṃ cid eva |
veda te takman pitaraṃ veda mātaram ||

20.39.2

śamīvān asi śāmīvataḥ
śamīvān ābhiśokiḥ |
abhiśoko hārṣaṇir
harṣaṇo jāñjabhiḥ ||

20.39.3

yaḥ paśūnāṃ mārjanīyo
yaṃ tvam aṃśena bhejiṣe |
abhīhi takman gardabhaṃ
na mām abhyetum arhasi ||

20.39.4

visrasā nāma te mātā
kiḥkiśo (⟨ kiṣkiṣo ?) nāma te pitā |
śimidā nāma te svasā ||

20.39.5

giriṃ gaccha girijā asi
girau te māhiṣo gṛhaḥ |
dāsī cakram āsthāya
nāmlāte ni krandayiṣyati ||

20.39.6

ā vāto vātv anaghaḥ
sarvasya dūto abhiśastipāḥ |
jalāṣam it pra siñcati
tad viṣasyāpa siñcatu ||

20.39.7

yām asyati pṛśnibāhur
iṣṭaṃ haridruparṇyam |
tām asya niṣ khidāmasi
yathā jīvāsi bhadrayā ||

20.39.8

aśrāntasya tvā manasā
yunajmi prathamasya ca |
utkūlam udvaho bhav-
-oduhya prati dhāvatāt ||

20.39.9

etaṃ dantaṃ nirṛtyā ghoram āhur
yasta āsann avarūḍha eṣaḥ |
taṃ durhārde pra hiṇomi ghoraṃ
sa no mā hiṃsīj jyāyaso mā kanīyasaḥ ||

20.39.10

śivaḥ śagmo bhavatu danta eṣa
mā no hiṃsīj jyāyaso mā kanīyasaḥ |
aghamāram aghaśaṃsaṃ nirṛthaṃ
taṃ te dantaḥ sacatāṃ ghora eṣaḥ ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0