Paippalāda-Saṃhitā · Chapter 20.40

aghamāram aghaśaṃsaṃ nirṛthaṃ
durhārde dantaṃ pra hiṇomi ghoram |
so asyāttu dvipadaś catuṣpadaḥ
śivo asmabhyaṃ sumanā astv eṣaḥ ||

śivaṃ te dantaṃ haviṣā kṛṇomi
śivo mahyaṃ kurvate danto astu |
śivāni te trīṇi trikadrukāṇi santu
śivo mahyaṃ nabhasī rodasī stām ||

pururūpā pṛthupeśā
araṃkṛd vahator asi |
pratiṣṭhāsi catuṣpadāṃ
yas ta eṣa pañcamaḥ pādas
taṃ tena prati gṛhṇāmi ||

sasarparīr amatiṃ bādhamānā
bṛhan mimāya jamadagnidattā |
ā sūryasya duhitā tatāna
śravo deveṣv amṛtam ajuryam ||

sasarparīr abharat tūyam ebhyo
'dhi śravaḥ pāñcajanyāsu kṛṣṭiṣu |
sā pakṣyā navyamāyur dadhānā
yāṃ me pulasti jamadagnayo daduḥ ||

aghnye dūramūt kanda
ni padaś caturo jahi |
adhā goduhaḥ śīrṣaṇi
śaphām̐ urasi vādaya ||

śṛṅgābhyām upa sraṣṭāraṃ
padāvartaya goduham |
atho ye anye tiṣṭhanti
tān viṣūco vi nāśaya ||

yathā nartā sakṣikājiṃ
ni kulpham abhinṛtyati |
evā tvam aghnye padaḥ
sarvān sākam ud ardaya ||

ud u kṣīram uttabhitaṃ
syandantām asya dhenavaḥ |
asṛk tasya gāvo duhrāṃ
yo asmān nāpacāyati ||

ṛkṣīkāyā yathā mano
vyāghrasya yathā manaḥ |
evā tasya gavāṃ mano
yo asmān nāpacāyati ||