Paippalāda-Saṃhitā · Chapter 20.3

idaṃ te havyaṃ ghṛtavat sarasvat-
-īdaṃ pitṝṇāṃ havirāsyaṃ yat |
imāni ta uditā śaṃtamāni
tebhir vayaṃ maghavānaḥ syāma ||

prapathe pathām ajaniṣṭa pūṣā
prapathe divaḥ prapathe pṛthivyāḥ |
ubhe abhi priyatame sadhasthe
ā ca parā ca carati prajānan ||

pūṣemā āśā anu veda sarvāḥ
so asmām̐ abhayatamena neṣat |
svastidā āghṛṇiḥ sarvavīro
+'prayucchan pura etu prajānan ||

pūṣā gā anv etu naḥ
pūṣā rakṣatv arvataḥ |
pūṣā vājaṃ sanotu naḥ ||

pūṣan tava vrate vayaṃ
na riṣyema kadā cana |
stotāras ta iha smasi ||

śukraṃ te anyad yajataṃ te anyad
viṣurūpe ahanī dyaur ivāsi |
viśvā hi māyā avasi svadhāvo
bhadrā te pūṣann iha rātir astu ||

dhātā dadhātu dāśuṣe
prāñcaṃ jīvātum akṣitam |
vayaṃ devasya dhīmahi
sumatiṃ satyadharmaṇaḥ ||

dhātā viśvāni dāśuṣe dadhātu
prajākāmāya dāśuṣe duroṇe |
tasya prajā amṛtāḥ saṃ vyayantu
viśve devāso aditiḥ sajoṣāḥ ||

dhātā rātiḥ savitedaṃ juṣantāṃ
prajāpatir nidhipatir no agniḥ |
tvaṣṭā pūṣā prajayā saṃrarāṇo
yajamānāya draviṇaṃ dadhātu ||

dhātā prajānām uta rāya īśe
dhātedaṃ viśvaṃ bhuvanaṃ jajāna |
saṃ dāśuṣe vahatu bhūri puṣṭā
tasmai devāya haviṣā vidhema ||