Paippalāda-Saṃhitā · Chapter 20.4

sāvīr hi deva prathamāya pitre
varṣmāṇam asmai varimāṇam asmai |
athāsmabhyaṃ savitar vāryāṇi
dvedve ā suvā bhūri paśvaḥ ||

bhadrād adhi śreyaḥ prehi
bṛhaspatiḥ puraetā te astu |
athemam asyā vara ā pṛthivyā
āreśatruṃ kṛṇuhi sarvavīram ||

damūnā devaḥ savitā vareṇyo
dadhad ratnaṃ dakṣaṃ pitṛbhya āyūṃṣi |
pibāt somaṃ mamadad enam iṣṭe
parijmā cid ramate asya dharmaṇi ||

tāṃ savituḥ satyasavasya citrāṃ
vayaṃ devasya prasave vanāmahe |
yām asya kaṇvo aduhat prapīnāṃ
sahasradhārāṃ mahiṣo bharāya ||

ko no asyā druho 'vadyavatyā
un neṣati kṣatriyo vasya icchan |
kaḥ pūrtikāmaḥ ka u yajñakāmaḥ
ko deveṣu vanute dīrgham āyuḥ ||

kaḥ pṛśniṃ dhenuṃ varuṇena dattām
atharvaṇe sudughāṃ nityavatsām |
tāṃ bṛhaspatyā sakhyā duhāno
yathāvaśaṃ tanvaḥ kalpayāti ||

na ghraṃs tatāpa na himo jaghāna
pra sarsṛte pṛthivī jīradānuḥ |
āpaś cid asmai sadam it kṣaranti
yatra somaḥ sadam it tatra bhadram ||

yasyā idaṃ pradiśi yad virocate
anumatiṃ prati bhūṣanty āyavaḥ |
yasyā upastha urv antarikṣaṃ
sā naḥ śarma bahulaṃ ni yacchāt ||

anv adya no anumatir
yajñaṃ deveṣu yacchatām |
agniś ca havyavāhano
bhavatāṃ dāśuṣe mayaḥ ||

anv id anumate tvaṃ
maṃsase śaṃ ca nas kṛdhi |
iṣaṃ tokāya no dadhaḥ
pra ṇa āyūṃṣi tāriṣaḥ ||